میاں چنوں ( پاک ترک نیوز) اولمپک گولڈ میڈلسٹ ارشد ندیم نے رواں ماہ کسی مقابلے میں شرکت کے بجائے ٹریننگ پر توجہ دینے کا فیصلہ کرلیا۔
ذرائع کے مطابق ارشد ندیم کی جنوبی افریقہ میں ٹریننگ کا پروگرام طے ہوگیا ہے، وہ ویزا ملتے ہی جنوبی افریقہ روانہ ہوں گے۔
ارشد ندیم جنوبی افریقہ کے شہر پوچفسٹروم میں تقریباً دو ہفتے ٹریننگ کریں گے۔ وہ اس سے قبل بھی جنوبی افریقہ میں دو مرتبہ ٹریننگ کرچکے ہیں۔
یہ بھی پڑھیں: کرسٹیانو رونالڈو کی پارٹنر جیورجینا روڈریگز سے شادی
ذرائع کے مطابق جنوبی افریقہ میں تیاریوں کے بعد ارشد ندیم ورلڈ ایتھلیٹکس الٹی میٹ چیمپئن شپ میں شرکت کریں گے، جو 6 سے 14 ستمبر تک بوڈاپسٹ میں منعقد ہوگی۔
الٹی میٹ چیمپئن شپ کے بعد ارشد ندیم ایشین گیمز میں پاکستان کی نمائندگی کریں گے۔دوسری جانب ارشد ندیم 21 اگست کو لوزین ڈائمنڈ لیگ میں ایکشن میں نظر نہیں آئیں گے۔ لوزین ڈائمنڈ لیگ کی ابتدائی انٹری لسٹ میں ارشد ندیم کا نام شامل تھا، تاہم اب انہوں نے ٹریننگ پر توجہ دینے کا فیصلہ کیا ہے۔
