اسلام آباد ( پاک ترک نیوز) متحدہ عرب امارات نے کئی مہینوں کی غیر یقینی صورتحال کو کم کرتے ہوئے رجسٹرڈ ٹریول ایجنٹس کے ذریعے درخواست دینے والے پاکستانی شہریوں کو وزٹ ویزے کا اجراء دوبارہ شروع کر دیا ہے۔ جس سے پاکستانیوں کے اہم سمندر پار سفری مقامات میں سے ایک کے سفر میں خلل دور ہو گیاہے۔
متحدہ عرب امارات تقریباً 1.8 ملین پاکستانیوں کا گھر ہے اور یہ ملک کے ترسیلات زر کے سب سے بڑے ذرائع میں سے ایک ہے۔ یہ نرمی درخواست دہندگان کی جانب سے مہینوں کی طویل تاخیر اور جانچ پڑتال میں اضافے کی شکایات کے بعد سامنے آئی ہے۔حالانکہ اسلام آباد اور ابوظہبی دونوں نے بار بار کہا کہ پاکستانی شہریوں پر کوئی سرکاری ویزا پابندی نہیں ہے۔
ٹریول ایجنٹس ایسوسی ایشن آف پاکستان کا کہنا ہے کہ سب سے بڑی تبدیلی خاندانوں کے لیے آئی ہے۔ جن درخواستوں کو پہلے طویل تاخیر کا سامنا کرنا پڑتا تھا اب ان پر زیادہ آسانی سے کارروائی ہو رہی ہے۔پاکستان میں متحدہ عرب امارات کے سفارت خانے نے اہل خانہ کے ساتھ سفر کرنے والے پاکستانی سیاحوں کو ویزا جاری کرنا شروع کر دیا ہے جو کہ ایک مثبت پیش رفت ہے۔اب اہل خانہ کے ساتھ سفر کرنے والے یا پہلے سے ہی متحدہ عرب امارات میں مقیم رشتہ داروں کے ساتھ شامل ہونے والے درخواست دہندگان کوبروقت جواب مل رہا ہے۔
اسی کے ساتھ سیاحت کے فروغ کی اماراتی مہم بھی دوبارہ شروع ہو گئیہے۔جبکہ حالیہ علاقائی کشیدگی کے دوران مسافروں کی آمدورفت میں آنے والی کمی اب آہستہ آہستہ بحال ہو رہی ہے۔چنانچہ پاکستان سے دبئی جانے والے یومیہ مسافروں کی تعداد رواں موسم گرما کے ایک دن پہلے 170 سے بڑھ کر جولائی کے آخری ہفتےمیں تقریباً 400 تک پہنچ گئی ہے۔تاہم مسافروں کی یہ تعداد دو سال قبل ریکارڈ کی گئی تقریباً 1,000 مسافریومیہسے کافی نیچے ہے۔
یہ بھی پڑھیں: امریکا کے ویزا ویور پروگرام کے نئے قواعد ،متعدد ممالک کے مسافروں پر پابندیاں برقرار
ٹریول ایجنٹس ایسوسی ایشن آف پاکستان کی رپورٹ میں کہا گیا ہےکہ فیملی ویزا درخواستوں میں انفرادی درخواست دہندگان کے لیے کئی برسوں سے زیادہ مسترد ہونے کی شرح کے بعد اب زیادہ کامیابی ملنا شروع ہو گئی ہے۔ گزشتہ ہفتے سے صورتحال میں بہتری آئی ہے اور فیملیز کے ساتھ سفر کرنے والے زیادہ پاکستانیوں کو ویزا مل رہا ہے۔ فی الحال یو اے ای آنے والے پاکستانی سیاحوں میں سے تقریباً 10 فیصد فیملی ٹریولرز ہیں۔
مزید براں پاکستان میں متحدہ عرب امارات کے سفارت خانےکی طرف سے بھی تصدیق کی گئی ہے کہ رجسٹرڈ ٹریول ایجنسیوں کے ذریعے درخواست دینے والے عام پاسپورٹ رکھنے والوں کو وزٹ ویزے جاری کیے جا رہے ہیں۔چنانچہ عام پاسپورٹ کے لیے ویزے ٹریول ایجنٹس کے ذریعے کھلے ہیں۔سفارتخانے کے مطابق حفاظتی وجوہات کی بناء پر کارروائی میں پہلے مقامی تاخیر کا سامنا کرنا پڑرہا تھا۔ مگر اب مکمل دستاویزات کے حامل درخواست دہندگان بغیر کسی مشکل کے درخواست دے سکتے ہیں۔ پاکستانی شہریوں کے لیے ویزا پروسیسنگ میں یہ نرمی مہینوں کی تشویش کے بعد کی گئی ہے۔
