تیانجن(پاک ترک نیوز) شنگھائی تعاون تنظیم کے25ویں سربراہان مملکت کونسل کے اجلاس میں چینی صدر شی جن پنگ نے ایس سی او ترقیاتی بینک کے قیام کی تجویز دے دی۔
تفصیلات کے مطابق چینی صدرشی جن پنگ نے ایس سی اوسربراہ اجلاس سے خطاب کرتے ہوئے کہا کہ ایس سی اوباہمی اعتمادا ورباہمی مفادکے اصولوں کے تحت آگے بڑھ رہی ہے،وقت گزرنے کے ساتھ تنظیم تناوردرخت بن چکی ہے۔
چینی صدر نے کہا کہ ایس سی اورکن ممالک کے درمیان تعاون کووسعت دینے کی بہت گنجائش ہے،رکن ملکوں کوتجارت اورمعیشت کے شعبوں میں دستیاب مواقع سے فائدہ اٹھانا ہوگا، وسائل میں اضافے کے لیے استعدادکار میں اضافہ ضروری ہے۔
ایس سی او ملکوں کے درمیان سائنس و ٹیکنالوجی میں تعاون کی ضرورت ہے، چینی صدرشی جن پنگ نے ایس سی اوترقیاتی بینک کے قیام کی تجویز دی اور کہا کہ مشترکہ خوشحال مستقبل کے لیے تجارتی اورمواصلاتی رابطے بڑھانا ہوں گے۔
یاد رہے کہ چین کے شہر تیانجن میں شنگھائی تعاون تنظیم کا سربراہ اجلاس میں 20 ممالک کے سربراہان شریک ہیں۔ چین کے شہر تیانجن میں شنگھائی تعاون تنظیم کے سربراہ اجلاس کا آغاز ہو چکا ہے، پاکستانی وزیراعظم شہباز شریف اجلاس میں شرکت کے لئے پہنچے تو چینی صدر شی جن پنگ نے ان کا استقبال کیا۔
چینی صدرنے افتتاحی سیشن میں آئے روس کے صدر پیوٹن، ترک صدر رجب طیب اردگان، ایرانی صدر مسعود پزشکیان اور دیگر رہنماؤں کو بھی خوش آمدید کہا،ایس سی او سمٹ میں وزیراعظم شہباز شریف عالمی رہنماؤں کی توجہ کا مرکز بنے رہے، اجلاس سے قبل رکن ممالک کے سربراہان نے گروپ فوٹو بنوایا۔
چینی صدر شی جن پنگ کا کہنا تھا کہ اجلاس کا اہم مشن تمام فریقین کے درمیان اتفاق رائے قائم کرنا، تعاون کی رفتار کو فروغ دینا ہے، چینی صدر نے مہمانوں کو عشائیہ بھی دیا۔
ایس سی او اجلاس میں پاکستانی وزیراعظم شہباز شریف پاکستان کا نقطہ نظر پیش کریں گے، عالمی مسائل اجاگر کرنے کے ساتھ ساتھ خطے میں تعاون اور استحکام کو فروغ دینے کیلئے ایس سی او کے کردار کو مضبوط بنانے سے متعلق تجاویز بھی پیش کریں گے۔
اجلاس کے افتتاحی سیشن کے موقع پر وزیرا عظم شہباز شریف نے روسی صدر ولادی میر پیوٹن سے مختصر گفتگوکی، ترکیہ کے صدر رجب طیب اردوان سے ملاقات میں فلسطین کی بگڑتی ہوئی صورتِ حال، پاک ترک دو طرفہ تعلقات سمیت سیاسی، اقتصادی اور دفاعی شعبوں میں تعاون پر بات چیت کی گئی۔
چینی صدر نے ایس سی او ترقیاتی بینک کے قیام کی تجویز دے دی
