اسلام آباد ( پاک ترک نیوز) تحریک انصاف نے سپریم کورٹ کی جانب سے بانی پی ٹی آئی کو اسپتال منتقل کرنے کے فیصلے کا خیرمقدم کرتے ہوئے عدالتی احکامات پر من و عن عملدرآمد کی یقین دہانی کرا دی۔
چیئرمین تحریک انصاف بیرسٹر گوہر علی خان نے کہا کہ سپریم کورٹ نے قانون کے مطابق انصاف فراہم کیا، تحریک انصاف کو صرف بانی پی ٹی آئی کی صحت کی فکر ہے اور پارٹی عدالتی احکامات پر عمل کرے گی۔
بیرسٹر گوہر نے عوام سے بھی اپیل کی کہ عدالتی حکم کی پیروی کی جائے۔ ان کا کہنا تھا کہ تحریک انصاف کا مقصد بانی پی ٹی آئی کی رہائی ہے۔
وزیراعلیٰ خیبر پختونخوا سہیل آفریدی نے کہا کہ اسپتال کے اردگرد تحریک انصاف کا کوئی رکن جمع نہیں ہوگا، پارٹی کارکنان صبر اور تحمل کا مظاہرہ کریں گے اور سپریم کورٹ کے فیصلے پر جلد عملدرآمد ہونا چاہیے۔
یہ بھی پڑھیں: سپریم کورٹ کابانی پی ٹی آئی کو آج ہی شفا انٹرنیشنل اسپتال منتقل کرنے کا حکم
انہوں نے کہا کہ بانی پی ٹی آئی کروڑوں پاکستانیوں کی امید ہیں، اس امید کو ٹوٹنے نہیں دینا۔ ان کا کہنا تھا کہ اگر کوئی انتشار پھیلانے کی کوشش کرے تو تحریک انصاف کو ایسے عناصر کی نشاندہی کرنا ہوگی۔
وزیراعلیٰ خیبر پختونخوا نے واضح کیا کہ تحریک انصاف کوئی مسلح جتھا نہیں، مؤثر مذاکرات ہوں تو پارٹی انہیں ضرور خوش آمدید کہے گی۔
