لاہور( پاک ترک نیوز) پاکستان کرکٹ بورڈ کے ڈائریکٹر ہائی پرفارمنس عاقب جاوید نے اوپننگ بیٹر امام الحق کے لارڈز ٹیسٹ میں دونوں اننگز میں بیٹنگ نہ کرنے پر شدید مایوسی کا اظہار کرتے ہوئے کہا ہے کہ امام الحق کو انجری کے معاملے پر تحقیقات کا سامنا کرنا ہوگا اور اس حوالے سے کارروائی کی جائے گی۔عاقب جاوید نے کہا امام الحق کی انجری ایک بڑا سوالیہ نشان اور گہری مایوسی کا باعث ہے۔ ان کے مطابق ماضی میں کھلاڑی انجری کے باوجود میدان میں اترنے کی کوشش کرتے تھے، لیکن امام الحق کے پٹھے میں کھنچاؤ نے انہیں دونوں اننگز میں بیٹنگ سے کیسے مکمل طور پر روک دیا، یہ قابلِ سوال ہے۔
انہوں نے کہا کہ وہ یہ نہیں کہہ سکتے کہ امام الحق نے انجری کا ڈرامہ کیا، تاہم پٹھے میں کھنچاؤ کے باوجود بیٹنگ کی کوشش کی جانی چاہیے تھی۔ امام الحق کو اس معاملے پر تحقیقات کا سامنا کرنا ہوگا۔امام الحق ان سات کھلاڑیوں میں شامل تھے جنہیں لارڈز ٹیسٹ میں انگلینڈ کے ہاتھوں بھاری شکست کے بعد پاکستان واپس بلا لیا گیا۔ ٹیسٹ کے دوسرے روز کھیل شروع ہونے سے کچھ دیر قبل پاکستان کرکٹ بورڈ نے بتایا تھا کہ امام الحق کی بائیں پنڈلی کے پٹھے میں چوٹ آئی ہے اور میچ میں ان کی مزید شرکت طبی رائے سے مشروط ہوگی۔
یہ بھی پڑھیں: بابراعظم کی طبیعت ناساز،تیسرے ٹیسٹ میں شرکت پر سوالیہ نشان
عاقب جاوید نے کہا کہ پاکستان کرکٹ بورڈ کی جانب سے واپس بلائے گئے کھلاڑیوں کو واضح پیغام دیا گیا ہے کہ اہم دوروں پر انہیں اپنی کارکردگی بہتر بنانا ہوگی، مقابلہ کرنا ہوگا اور میدان میں کوشش نظر آنی چاہیے۔
