اسلام آباد ( پاک ترک نیوز) بانی پی ٹی آئی عمران خان کی ہسپتال منتقلی سے متعلق سپریم کورٹ کے فیصلے کے خلاف وفاق نے دوبارہ نظرثانی درخواست دائر کردی۔ذرائع کے مطابق نئی متفرق نظرثانی درخواست سپریم کورٹ میں جمع کرائی گئی ہے۔ درخواست رجسٹرار آفس کی جانب سے پہلے عائد کیے گئے اعتراضات دور کرنے کے بعد دوبارہ دائر کی گئی۔درخواست میں مؤقف اختیار کیا گیا ہے کہ بانی پی ٹی آئی کو ہسپتال منتقل کرنے سے متعلق عدالتی فیصلے میں قانونی سقم موجود ہیں، جبکہ فیصلے میں جیل رولز کو نظر انداز کیا گیا۔
وفاق کی جانب سے درخواست میں کہا گیا ہے کہ جس مرکزی مقدمے میں بانی پی ٹی آئی کی ہسپتال منتقلی کا فیصلہ دیا گیا، اس میں وفاق کو فریق ہی نہیں بنایا گیا۔درخواست میں مؤقف اختیار کیا گیا ہے کہ وفاق کو سنے بغیر دیا گیا فیصلہ قانونی طور پر نظرثانی کا متقاضی ہے۔
یہ بھی پڑھیں: بانی پی ٹی آئی کی صحت کو سیاسی رنگ دیا جا رہا ہے، کوئی تشویشناک بات نہیں، خواجہ آصف
درخواست میں عدالت سے استدعا کی گئی ہے کہ متفرق درخواست منظور کرتے ہوئے نظرثانی کی اجازت دی جائے اور 18 اگست کو جاری کیے گئے فیصلے پر نظرثانی کی جائے۔
