لاہور:(پاک ترک نیوز)قومی کرکٹ ٹیم کے لیے خوش آئند خبر سامنے آ گئی ہے، فاسٹ بولر شاہین شاہ آفریدی نے انجری کے بعد فٹنس ٹیسٹ کامیابی سے کلیئر کر لیا ہے، جس کے بعد آسٹریلیا کے خلاف ہوم سیریز میں ان کی شمولیت کے امکانات خاصے بڑھ گئے ہیں۔
ذرائع کے مطابق شاہین آفریدی کا حال ہی میں دو روزہ فٹنس اور میڈیکل اسسمنٹ کیا گیا، جس میں ان کے ورک لوڈ، گھٹنے کی مکمل ریکوری اور طویل المدتی فٹنس کو خاص طور پر جانچا گیا۔
ٹیم کے میڈیکل اسٹاف اور مینجمنٹ نے تمام رپورٹس کا تفصیلی جائزہ لینے کے بعد بائیں ہاتھ کے فاسٹ بولر کو دوبارہ مقابلہ جاتی کرکٹ کے لیے موزوں قرار دے دیا ہے۔
فٹ قرار دیے جانے کے بعد شاہین آفریدی اب قومی ٹیم کے انتخاب کے لیے دستیاب ہوں گے اور امکان ہے کہ انہیں آسٹریلیا کے خلاف ہوم ٹی ٹوئنٹی سیریز کے اسکواڈ میں شامل کر لیا جائے۔
شائقین کرکٹ کو امید ہے کہ شاہین اپنی رفتار اور سوئنگ سے ایک بار پھر حریف بیٹنگ لائن کو مشکلات سے دوچار کریں گے۔
واضح رہے کہ شاہین آفریدی کو یہ انجری بگ بیش لیگ کے دوران 27 دسمبر کو اس وقت پیش آئی تھی جب وہ برسبین ہیٹ کی نمائندگی کرتے ہوئے ایڈیلیڈ اسٹرائیکرز کے خلاف میچ کھیل رہے تھے۔
میچ کے دوران گھٹنے میں تکلیف بڑھنے پر انہیں میدان چھوڑنا پڑا، جس کے بعد وہ ٹورنامنٹ کے بقیہ میچز سے دستبردار ہو گئے تھے۔
ان کی عدم موجودگی میں برسبین ہیٹ نے زمان خان کو اسکواڈ میں شامل کیا، جبکہ اسی انجری کے باعث شاہین پاکستان کی سری لنکا کے خلاف حالیہ ٹی ٹوئنٹی سیریز بھی نہیں کھیل سکے تھے۔
یاد رہے کہ پاکستان اور آسٹریلیا کے درمیان ٹی ٹوئنٹی سیریز کے میچز 29 اور 31 جنوری اور یکم فروری کو قذافی اسٹیڈیم لاہور میں شیڈول ہیں، جہاں شاہین آفریدی کی واپسی قومی ٹیم کے لیے بڑا بوسٹ ثابت ہو سکتی ہے۔
