راولپنڈی ( پاک ترک نیوز) سکیورٹی فورسز کی خیبرپختونخوا اور بلوچستان میں فتنہ الخوارج اور فتنہ الہندوستان کے دہشتگردوں کے خلاف کامیاب کارروائیاں جاری ہیں۔سکیورٹی ذرائع کے مطابق جنوبی وزیرستان، بنوں اور بلوچستان کے ضلع خضدار میں انٹیلی جنس بیسڈ آپریشنز کیے گئے، جن کے دوران مجموعی طور پر 11 دہشتگرد ہلاک ہوئے۔بنوں میں فتنہ الخوارج کے خلاف کارروائی کے دوران 2 دہشتگرد ہلاک کیے گئے جبکہ اسلحہ اور گولہ بارود بھی برآمد ہوا۔ کارروائی میں بارودی مواد سے دہشتگردوں کے ٹھکانے کو تباہ کردیا گیا۔
سکیورٹی ذرائع کے مطابق جنوبی وزیرستان کے علاقے لدھا میں خفیہ اطلاع پر کارروائی کے دوران 5 خوارج ہلاک ہوئے۔ سیکیورٹی فورسز نے دہشتگردوں کی نقل و حرکت کا بروقت سراغ لگا کر انہیں گھیرے میں لیا اور مؤثر کارروائی کی۔دوسری جانب بلوچستان کے ضلع خضدار کے علاقے ساسول میں فتنہ الہندوستان کے خلاف کارروائی میں 4 دہشتگرد ہلاک ہوئے۔ سیکیورٹی ذرائع کے مطابق دہشتگردوں کو کوآڈ کاپٹر کی مدد سے مؤثر انداز میں نشانہ بنایا گیا۔
یہ بھی پڑھیں: میرا خیال ہے مجتبیٰ خامنہ ای شدید زخمی ہیں، ہلاک نہیں ہوئے،ٹرمپ
سکیورٹی ذرائع کا کہنا ہے کہ کارروائیوں کے دوران شہریوں کے جان و مال کے تحفظ کو یقینی بنایا گیا اور مقامی آبادی کو کسی نقصان سے محفوظ رکھا گیا۔سکیورٹی فورسز کے مطابق ملک سے دہشتگردی کے ناسور کے مکمل خاتمے تک عزمِ استحکام وژن کے تحت کارروائیاں جاری رہیں گی۔
