ریاض ( پاک ترک نیوز) سعودی وزارت حج و عمرہ نےابھی سے 2027 کے حج سیزن کے لیے تیاریاں شروع کر دی ہیں۔اس ضمن میں متعدد اصلاحات کا اعلان کیا گیا ہے جن کا مقصد عازمین کی خدمات کو بہتر کرنا، رہائش کے معیار کو بڑھانا اور حج آپریشنز کی نگرانی کومستحکم بنانا ہے۔
ان منصوبوں کا اعلان وزیر حج و عمرہ توفیق الربیعہ نے مکہ مکرمہ میں وزارت حج و عمرہ کی حج کی سالانہ اختتامی تقریب کے دوران کیا۔ جہاں حکام نے ابتدائی فریم ورک پیش کیا جو اگلے حج سے قبل دنیا بھر کے حج امور کے دفاتر کے ساتھ رابطہ کاری کی رہنمائی کرے گا۔
سب سے اہم تبدیلیوں میں سے ایک مربوط سروس ماڈل کا تعارف ہے جو مکہ اور مدینہ میں رہائش کو ایک متحد پیکج کے تحت ٹرانسپورٹیشن اور کیٹرنگ سروسز کے ساتھ جوڑتا ہے۔ سعودی حکام نے کہا ہےکہ یہ خدمات مملکت میں حجاج کے قیام کے دوران حج کے پروگراموں کے لازمی اجزاء بن جائیں گی۔
وزارت نے حج پیکجوں کی تنظیم نو کا بھی اعلان کیا ہے۔ موجودہ پیشکشوں کو تین زمروں میں کم کر کے حجاج کی ضروریات اور ترجیحات کو بہتر انداز میں باہم ملاتے ہوئے زیادہ لچک فراہم کرنا ہے۔ اس تبدیلی کے بعد موجودہ پیکیجزمیں سے ایک جسے پیکیج ڈی کے نام سے جانا جاتا ہے۔ وہ نئے نظام کے تحت بند کر دیا جائے گا۔
وزارت نے 1448 ہجری کے حج سیزن کی تیاریوں کے لیے ایک ٹائم ٹیبل کا خاکہ بھی پیش کیا ہے۔ 30 جون 2026 سے حج امور کے دفاتر اور بین الاقوامی حج سروس فراہم کرنے والے مکہ مکرمہ اور مدینہ منورہ میں رہائش کے لیے ترجیحیحقوق حاصل کر سکیں گے۔
سعودی وزارت حج نے کہا ہےکہ مقدس مقامات کے اندر اپنے موجودہ مقامات کو برقرار رکھنے کی کوشش کرنے والی تنظیموں کو نئے جامع سروس پیکج کے لیے معاہدہ کرتے وقت ترجیح دی جائے گی۔ جبکہ ریزرویشن کی مدت 13 اگست 2026 تک جاری رہے گی۔
یہ اقدامات حجاج کے تجربے کو بہتر بنانے، آپریشنل کارکردگی کو بڑھانے اور سروس کے معیار کو مضبوط بنانے کے لیے سعودی عرب کی وسیع تر کوششوں کا حصہ ہیں کیونکہ مملکت دنیا کے سب سے بڑے سالانہ مذہبی اجتماع کے انتظام کو جدید بنا رہی ہے۔
