اسلام آباد(پاک ترک نیوز ) ایکسپورٹ ڈویلپمنٹ فنڈ نے برآمدکنندگان کی سہو لت اور پاکستان کی برآمدی صلاحیت بڑھانے کے لیے دستیاب تمام 24 ارب روپے مختلف اقدامات میں سرمایہ کاری کے لیے مختص کر دیے ہیں۔وزیراعظم شہباز شریف کی زیر صدارت ایکسپورٹ ڈویلپمنٹ فنڈ کی تنظیم نو اور اصلاحاتی پروگرام سے متعلق اجلاس ہوا، جس میں وزیراعظم کو فنڈ کی رقم مختص کیے جانے سے آگاہ کیا گیا۔
دوسری جانب ایکسپورٹ ڈویلپمنٹ فنڈ اور ایکسپورٹ امپورٹ بینک آف پاکستان کے مشترکہ اقدام کے تحت 3 ارب روپے کا رسک پول قائم کر دیا گیا ہے، جس کا مقصد خصوصاً چھوٹے اور درمیانے درجے کے کاروباری اداروں کے لیے ایکسپورٹ کریڈٹ انشورنس تک رسائی آسان بنانا ہے۔وزیراعظم شہباز شریف نے انشورنس سہولت کا خیرمقدم کرتے ہوئے کہا کہ اس سے ایس ایم ایز کو برآمدی تحفظ حاصل ہوگا اور کاروباری ادارے اپنی برآمدات کا حجم بڑھا سکیں گے۔
یہ بھی پڑھیں: ایران کا آبنائے ہرمز کے باہر نو گو زون قائم کرنے کا فیصلہ
اجلاس کو بتایا گیا کہ ایکسپورٹ ڈویلپمنٹ فنڈ آئندہ کسی اضافی انفراسٹرکچر منصوبے پر اخراجات نہیں کرے گا۔ فنڈ کے وسائل تحقیق، ہنرمندی کے فروغ اور پاکستانی کاروباری اداروں کی مسابقتی صلاحیت بہتر بنانے والے اقدامات پر خرچ کیے جائیں گے۔اجلاس کو یورپی یونین کے جی ایس پی پلس پروگرام کے تحت پاکستان کو حاصل ترجیحی مارکیٹ رسائی میں توسیع کے لیے جاری کوششوں سے بھی آگاہ کیا گیا۔
