لندن(پاک ترک نیوز ) جمیکا کا ایک اعلیٰ سطحی وفد غلامی کے تاریخی ورثے کے ازالے اور معاوضے کے مطالبے پر مشتمل اہم درخواست برطانوی بادشاہ کنگ چارلس کو پیش کرنے کے لیے برطانیہ پہنچ گیا ہے۔جمیکا کی وزیر ثقافت اولیویا گرینج اور نیشنل کونسل آن ریپریشنز کے ارکان کنگ چارلس کو یہ درخواست پیش کریں گے۔ کنگ چارلس جمیکا کے آئینی سربراہِ مملکت بھی ہیں۔اولیویا گرینج کا کہنا ہے کہ جمیکا ایک مضبوط اور باصلاحیت قوم ہے، تاہم غلامی کے دور سے ورثے میں ملنے والے مسائل آج بھی ملک اور عوام کو نقصان پہنچا رہے ہیں۔
انہوں نے کہا کہ اگر غلامی کے نتیجے میں پیدا ہونے والے یہ مسائل ورثے میں نہ ملتے تو جمیکا کہیں زیادہ ترقی کرسکتا تھا۔یہ درخواست پہلی بار گزشتہ سال جون میں سامنے آئی تھی۔ اس میں کنگ چارلس سے مطالبہ کیا گیا ہے کہ وہ لندن میں قائم پرِیوِی کونسل کی جوڈیشل کمیٹی سے قانونی رائے حاصل کرنے کی درخواست کریں۔جمیکا جاننا چاہتا ہے کہ افریقی افراد کو زبردستی جمیکا منتقل کرنا قانونی تھا یا نہیں، آیا یہ عمل انسانیت کے خلاف جرم کے زمرے میں آتا تھا، اور کیا برطانیہ غلامی اور اس کے دیرپا اثرات کے ازالے کے لیے جمیکا کو معاوضہ دینے کا قانونی پابند ہے۔
یہ بھی پڑھیں: برآمدی شعبے کے لیے 24 ارب روپے مختص
اولیویا گرینج کے مطابق ان سوالات کے قانونی جواب جمیکا کے معاوضے کے مطالبے کو آگے بڑھانے کے لیے انتہائی اہم ہیں۔تاریخی اندازوں کے مطابق 15ویں سے 19ویں صدی کے دوران ایک کروڑ 25 لاکھ سے زائد افریقی افراد کو اغوا کرکے زبردستی امریکا منتقل کیا گیا اور غلام بنا کر فروخت کیا گیا۔
