اسلام آباد(پاک ترک نیوز) وفاقی حکومت نے ملک کی بڑی سرکاری توانائی کمپنیوں پاکستان پیٹرولیم لمیٹڈ (پی پی ایل) اور آئل اینڈ گیس ڈویلپمنٹ کمپنی لمیٹڈ (او جی ڈی سی ایل) کے بورڈز میں اہم تعیناتیوں کی منظوری دے دی۔
وزارت خزانہ کے مطابق کابینہ کمیٹی برائے سرکاری ملکیتی ادارے کا اجلاس وفاقی وزیر خزانہ و محصولات سینیٹر محمد اورنگزیب کی زیر صدارت ہوا، جس میں پی پی ایل اور او جی ڈی سی ایل کے بورڈز سے متعلق اہم تجاویز پر غور کیا گیا۔اجلاس میں پاکستان پیٹرولیم لمیٹڈ کے بورڈ میں خالی نشست پر ایک نئے آزاد ڈائریکٹر کی تعیناتی کے لیے پیٹرولیم ڈویژن کی تجویز کی منظوری دی گئی۔
حکومت کے مطابق اس تعیناتی کا مقصد پی پی ایل کے بورڈ کو اسٹیٹ اونڈ انٹرپرائزز پالیسی 2023 کے تقاضوں سے مکمل طور پر ہم آہنگ کرنا ہے۔دوسری جانب ملک کی سب سے بڑی تیل و گیس تلاش کرنے والی کمپنی او جی ڈی سی ایل کے بورڈ کی تشکیل نو کے لیے تین آزاد ڈائریکٹرز کی تعیناتی کی بھی منظوری دے دی گئی۔
یہ بھی پڑھیں: عید میلاد النبی ﷺ پر 26 اگست کو ملک بھر میں عام تعطیل کا اعلان
حکومت کا کہنا ہے کہ ان اقدامات کا مقصد سرکاری توانائی کمپنیوں میں کارپوریٹ گورننس، شفافیت اور پالیسیوں پر سختی سے عمل درآمد یقینی بنانا ہے۔ذرائع کے مطابق بورڈز میں نئی تعیناتیوں کے ذریعے سرکاری ملکیتی توانائی اداروں کی کارکردگی کی نگرانی بہتر بنانے اور ان کے انتظامی ڈھانچے کو جدید کارپوریٹ اصولوں سے ہم آہنگ کرنے کی کوشش کی جا رہی ہے۔
حکومت کے اس اقدام کو ملک کے اہم توانائی اداروں میں بہتر انتظامی نگرانی، شفافیت اور کارکردگی بڑھانے کی وسیع تر پالیسی کا حصہ قرار دیا جا رہا ہے۔
