راولپنڈی ( پاک ترک نیوز) راولپنڈی میں برطانوی دور کا 124 سال پرانا تاریخی ریلوے ٹریک طویل وقفے کے بعد ایک بار پھر ٹرین کی آمدورفت سے آباد ہوگیا۔دو کوچز پر مشتمل مال بردار ٹرین نے راولپنڈی ریلوے اسٹیشن سے 502 ورکشاپ تک تاریخی ریلوے ٹریک پر کامیاب آزمائشی سفر مکمل کیا۔ٹرین نے کچہری چوک انڈر پاس سے گزرتے ہوئے 502 ورکشاپ تک سفر کیا۔ آزمائشی سفر کا مقصد ٹریک پر ٹرین کی محفوظ آمدورفت اور ورکشاپ کا سامان منتقل کرنے کے امکانات کو جانچنا تھا۔
یہ ریلوے ٹریک 1892 میں برطانوی دور حکومت میں تعمیر کیا گیا تھا اور راولپنڈی ریلوے اسٹیشن سے 502 ورکشاپ تک پھیلا ہوا ہے۔رپورٹ کے مطابق ایک صدی سے زائد عرصہ گزرنے کے باوجود ٹریک کی ساختی مضبوطی بڑی حد تک برقرار ہے، جبکہ اس کے بیشتر پرزے، بولٹ اور فٹنگز بھی مضبوط حالت میں موجود ہیں۔تاریخی ٹریک کو ابتدا میں فوجی ضروریات کے لیے تعمیر کیا گیا تھا اور آج بھی یہ اسی مقصد کے لیے استعمال کیا جا رہا ہے۔کچہری چوک کے مقام پر ٹریک کا راستہ محدود ہوگیا ہے اور یہ انڈر پاس، اوور ہیڈ پل اور مرکزی سڑک کے درمیان سے گزرتا ہے، جس کے باعث ٹرین کی آمدورفت شہریوں کے لیے ایک غیر معمولی منظر بن گئی۔ٹرین کے گزرنے کی تیز آواز نے اوور ہیڈ پل، انڈر پاس اور مرکزی شاہراہ سے گزرنے والے موٹرسائیکل سواروں، گاڑیوں اور پیدل افراد کی توجہ اپنی جانب مبذول کرلی۔
یہ بھی پڑھیں: خیبر میل سنگجانی کے قریب پٹری سے اتر گئی
بڑی تعداد میں وکلا، سائلین اور شہریوں نے پہلی بار دیکھا کہ کچہری چوک کے قریب سے ایک قدیم ریلوے ٹریک بھی گزرتا ہے اور طویل عرصے بعد اس پر دوبارہ ٹرین چل رہی ہے۔مقامی افراد نے طویل وقفے کے بعد ٹرین کو اس تاریخی ٹریک پر گزرتے دیکھا اور اس منفرد منظر سے محظوظ ہوئے۔
