پشاور ( پاک ترک نیوز) خیبر پختونخوا کے کئی علاقوں میں بادل جم کر برسے، پشاور، دیر بالا، رستم، صوابی اور مالاکنڈ میں وقفے وقفے سے بارش کا سلسلہ جاری ہے۔بارش کے بعد موسم خوشگوار ہوگیا اور گرمی کا زور ٹوٹ گیا، تاہم دیر بالا کے نشیبی علاقوں میں پانی جمع ہونے سے شہریوں کو مشکلات کا سامنا ہے۔شدید بارش کے باعث ندی نالوں میں پانی کی سطح بھی بلند ہوگئی ہے، جبکہ مقامی انتظامیہ کی جانب سے صورتحال پر نظر رکھی جا رہی ہے۔
یہ بھی پڑھیں: ملک میں مزید موسلادھار بارشوں کی پیش گوئی
محکمہ موسمیات نے کشمیر، گلگت بلتستان اور بالائی پنجاب میں موسلا دھار بارش کی پیشگوئی کی ہے۔این ڈی ایم اے نے آئندہ 72 گھنٹوں کے دوران ممکنہ سیلابی صورتحال کا الرٹ جاری کرتے ہوئے گلگت بلتستان، آزاد کشمیر اور خیبر پختونخوا کے دریاؤں اور ندی نالوں میں طغیانی، اچانک سیلاب اور لینڈ سلائیڈنگ کے خدشے سے آگاہ کیا ہے۔بارشوں کے باعث پہاڑی علاقوں میں لینڈ سلائیڈنگ کے خطرے کے پیش نظر شہریوں اور مسافروں کو احتیاط برتنے کی ہدایت کی گئی ہے۔ادھر لاہور میں بادلوں اور سورج کے درمیان آنکھ مچولی جاری ہے، جبکہ کراچی میں مطلع جزوی طور پر ابر آلود رہنے کا امکان ہے۔
محکمہ موسمیات اور متعلقہ اداروں نے شہریوں کو شدید بارش کے دوران غیر ضروری سفر سے گریز اور نشیبی علاقوں میں محتاط رہنے کی ہدایت کی ہے۔
