فیصل آباد(پاک ترک نیوز ) فیصل آباد گرین فیلڈ ایئرپورٹ کے ماسٹر پلان، فیزیبلٹی اسٹڈی اور ڈیزائن پر مشاورت کا عمل شروع ہوگیا ہے، جبکہ منصوبے کے لیے انفراسٹرکچر اور فضائی رابطوں کے فریم ورک پر بھی کام جاری ہے۔پاکستان ایئرپورٹس اتھارٹی کے کنسلٹنٹس نے فیصل آباد ڈویلپمنٹ اتھارٹی کے ڈائریکٹر جنرل محمد آصف چوہدری سے ملاقات کی، جس میں مجوزہ ایئرپورٹ اور شہر کی مستقبل کی شہری توسیع سے متعلق امور پر تبادلہ خیال کیا گیا۔
ملاقات کے دوران فیصل آباد کے مجوزہ ماسٹر پلان، زمین کے استعمال، سڑکوں کے نیٹ ورک، ٹرانسپورٹ انفراسٹرکچر، زوننگ اور شہر کو مجوزہ ایئرپورٹ سے ملانے والے رابطہ راستوں کا جائزہ لیا گیا۔ایف ڈی اے کے مطابق ماسٹر پلان فیصل آباد کی متوقع آبادی میں اضافے، مستقبل کی شہری توسیع، علاقائی سماجی و معاشی ضروریات اور زمین کے استعمال میں ممکنہ تبدیلیوں کو مدنظر رکھ کر تیار کیا جا رہا ہے۔حکام نے ان اہم شاہراہوں اور ٹرانسپورٹ لنکس کا بھی جائزہ لیا جو مجوزہ ایئرپورٹ کو فیصل آباد اور گردونواح سے منسلک کریں گے۔ڈائریکٹر جنرل ایف ڈی اے محمد آصف چوہدری نے کہا کہ ایئرپورٹ تک مؤثر رسائی یقینی بنانے اور مستقبل میں بڑھنے والی ٹریفک و تجارتی سرگرمیوں کو منظم کرنے کے لیے مربوط ترقیاتی فریم ورک ضروری ہوگا۔
یہ بھی پڑھیں: خلیجی ممالک کا متحدہ سیاحتی ویزا جلد جاری ہوگا، خلیجی تعاون کونسل
انہوں نے کہا کہ ایف ڈی اے منصوبے کے ماسٹر پلان، فیزیبلٹی اسٹڈی اور ڈیزائن کی تیاری میں پاکستان ایئرپورٹس اتھارٹی کے کنسلٹنٹس کو تکنیکی اور منصوبہ بندی سے متعلق معاونت فراہم کرے گا۔مجوزہ ایئرپورٹ کو فیصل آباد کے لیے فضائی رابطوں میں بہتری کا اہم ذریعہ قرار دیا جا رہا ہے۔ منصوبے سے شہر کی تجارت، برآمدات، سرمایہ کاری اور روزگار کے مواقع کو فروغ ملنے کی توقع ہے۔
