لاہور( پاک ترک نیوز) ہانگ کانگ سکسز کرکٹ ٹورنامنٹ کے لیے پاکستان کی ٹیم کا اعلان کر دیا گیا، عباس آفریدی قومی ٹیم کی قیادت کریں گے جبکہ رضا کچلو ٹیم کے منیجر ہوں گے۔تین روزہ ہانگ کانگ سکسز ٹورنامنٹ 30 اکتوبر سے یکم نومبر تک کھیلا جائے گا، جس میں 12 ٹیمیں حصہ لیں گی۔ شریک ٹیموں کو چار گروپس میں تقسیم کیا گیا ہے اور پاکستان کو گروپ سی میں رکھا گیا ہے۔پاکستان کے اعلان کردہ اسکواڈ میں کپتان عباس آفریدی کے علاوہ عبدالصمد، احمد دانیال، محمد عرفان خان، خواجہ نافع، محمد شہزاد اور سعد مسعود شامل ہیں۔قومی ٹیم ٹورنامنٹ میں شرکت کے لیے 28 اکتوبر کو ہانگ کانگ روانہ ہوگی۔
ہانگ کانگ سکسز چھ کھلاڑیوں پر مشتمل ٹیموں کا مختصر دورانیے کا کرکٹ مقابلہ ہے، جس میں تیز رفتار کھیل اور جارحانہ بیٹنگ شائقین کی توجہ کا مرکز ہوتی ہے۔ پاکستان ٹیم ایونٹ میں گروپ سی کے مقابلوں میں حصہ لے گی۔
