کراچی ( پاک ترک نیوز) کراچی میں میر رضا کیس کی تحقیقات کے لیے قائم جوڈیشل کمیشن کا اجلاس جسٹس عمر سیال کی سربراہی میں ان کے چیمبر میں ہوا۔ اجلاس میں سندھ حکومت کے فوکل پرسن اور ایڈیشنل سیکریٹری داخلہ جاوید ابڑو بھی پیش ہوئے۔ذرائع کے مطابق سندھ حکومت کے فوکل پرسن نے جسٹس عمر سیال کو کمیشن کی مدت میں توسیع سے متعلق آگاہ کیا۔ فوکل پرسن نے بتایا کہ سندھ کابینہ نے جوڈیشل کمیشن کی مدت میں توسیع کردی ہے، جس کے بعد کمیشن اپنی کارروائی جاری رکھ سکتا ہے۔فوکل پرسن کے مطابق کمیشن کی مدت میں مزید توسیع کے لیے آئندہ سندھ کابینہ سے دوبارہ اجازت لینے کی ضرورت نہیں ہوگی، جبکہ کمیشن کی مدت میں توسیع کا باقاعدہ نوٹیفکیشن بھی جلد جاری کردیا جائے گا۔اجلاس میں میر رضا کیس کی تحقیقات کو آگے بڑھانے کے لیے سینئر پولیس افسران سے تحریری سوالنامے بھی حاصل کرنے کا فیصلہ کیا گیا۔
یہ بھی پڑھیں: دہشت گرد کہیں سے بھی آئیں، دہشت گرد ہی ہوتے ہیں، مریم نواز
رجسٹرار جوڈیشل کمیشن کے مطابق سینئر پولیس افسران کو تحریری سوالنامے آج عدالتی معاون تجمل لودھی ایڈووکیٹ کے ذریعے ارسال کیے جائیں گے۔عدالتی معاون تجمل لودھی ایڈووکیٹ سوالنامے متعلقہ سینئر پولیس افسران تک پہنچائیں گے اور ان کے جوابات واپس جوڈیشل کمیشن تک پہنچائیں گے۔ذرائع کے مطابق کمیشن نے کیس کی تحقیقات میں پیش رفت کے لیے 5 اکتوبر کو تفتیشی افسر ڈی ایس پی سراج لاشاری اور شہری پولیس رابطہ کمیٹی کے نمائندے کاشف کو بھی طلب کر رکھا ہے۔
