راولپنڈی ( پاک ترک نیوز) پاکستان نے ایران اور امریکا کے درمیان جاری کشیدگی کے خاتمے اور خطے میں امن و استحکام کے فروغ کے لیے سفارتی کوششیں تیز کر دیں۔ فیلڈ مارشل سید عاصم منیر نے ایران کا اہم دورہ کیا، جہاں انہوں نے ایرانی صدر، اسپیکر پارلیمنٹ، وزیر خارجہ، وزیر داخلہ اور سربراہ قومی سلامتی کمیٹی سمیت اعلیٰ حکام سے ملاقاتیں کیں۔
آئی ایس پی آر کے مطابق فیلڈ مارشل سید عاصم منیر کی ایرانی قیادت کے ساتھ ہونے والی ملاقاتوں میں ایران امریکا کشیدگی سمیت خطے کی مجموعی سکیورٹی صورتحال پر تفصیلی تبادلہ خیال کیا گیا۔ملاقاتوں میں کشیدگی میں کمی، مذاکرات کے ذریعے مسائل کے حل اور خطے میں پائیدار امن کے قیام کے لیے ممکنہ اقدامات پر غور کیا گیا۔ اس موقع پر آبنائے ہرمز کو دوبارہ کھولنے اور اس اہم بحری گزرگاہ میں معمول کی سرگرمیوں کی بحالی سے متعلق امور بھی زیر بحث آئے۔
فیلڈ مارشل سید عاصم منیر نے اس بات پر زور دیا کہ خطے میں امن و استحکام کے لیے تنازعات کا حل طاقت کے بجائے مذاکرات اور سفارتی ذرائع سے تلاش کیا جانا چاہیے۔ پاکستان خطے میں کشیدگی کے خاتمے، باہمی اعتماد کے فروغ اور تمام فریقین کے درمیان بات چیت کی حوصلہ افزائی کے لیے اپنا تعمیری کردار ادا کرتا رہے گا۔آئی ایس پی آر کے مطابق ایرانی قیادت نے مذاکرات، کشیدگی میں کمی اور تنازع کے پرامن حل کے لیے سہولت کاری میں پاکستان کے تعمیری کردار اور مخلصانہ کوششوں کو سراہا۔
یہ بھی پڑھیں: ایران پر امریکا کی نئی معاشی پابندیاں، اقتصادی لائف لائنز منقطع کرنے کا اعلان
ایرانی قیادت نے پاکستان کی جانب سے خطے میں امن کے فروغ اور تنازعات کے پرامن حل کے لیے کی جانے والی سفارتی کوششوں کو مثبت قرار دیتے ہوئے ان کی اہمیت کو اجاگر کیا۔ملاقاتوں میں دونوں ممالک کے درمیان برادرانہ تعلقات، علاقائی سلامتی اور باہمی دلچسپی کے امور پر بھی تبادلہ خیال کیا گیا۔ فریقین نے خطے میں امن و استحکام کے لیے مشترکہ کوششیں جاری رکھنے کے عزم کا اظہار کیا۔
