اسلام آباد ( پاک ترک نیوز) پنجاب میں طویل عرصے سے زیرِ التوا بلدیاتی انتخابات کی تاریخ کے اعلان کے لیے الیکشن کمیشن کا اہم اجلاس آج ہوگا۔ الیکشن کمیشن نے صوبائی حکومت کو مشاورت کے لیے طلب کرلیا ہے اور پولنگ کی تاریخ طے کرنے پر غور کیا جائے گا۔
الیکشن کمیشن کا اجلاس آج ہو گا، جس میں پنجاب حکومت کی جانب سے تشکیل دی گئی کمیٹی بھی شرکت کرے گی۔پنجاب حکومت نے الیکشن کمیشن سے مشاورت کے لیے صوبائی وزراء پر مشتمل کمیٹی تشکیل دی ہے، جس کی سربراہی وزیر بلدیات ذیشان رفیق کریں گے۔
کمیٹی میں وزیر مائنز اینڈ منرلز سردار شیر علی گورچانی، وزیر زراعت سید محمد عاشق حسین شاہ اور وزیر اسکول ایجوکیشن رانا سکندر حیات شامل ہیں، جبکہ چیف سیکریٹری پنجاب زاہد اختر زمان بھی اجلاس میں شرکت کریں گے۔
یہ بھی پڑھیں: پنجاب میں ریسٹورنٹس اور فوڈ چینز میں ڈیجیٹل رسید لازمی قرار
قانونی تقاضوں کے تحت بلدیاتی انتخابات کی تاریخ کے اعلان سے قبل صوبائی حکومت سے مشاورت ضروری ہے۔ الیکشن کمیشن نے پنجاب میں بلدیاتی انتخابات کے لیے حلقہ بندیوں کا عمل مکمل کرلیا ہے اور انتخابی عمل آگے بڑھانے کی تیاری مکمل ہے۔پنجاب میں بلدیاتی اداروں کی مدت 31 دسمبر 2021 کو ختم ہوئی تھی، جس کے بعد سے صوبے میں بلدیاتی انتخابات کا انعقاد مسلسل تاخیر کا شکار ہے۔
الیکشن کمیشن کے مطابق حالیہ پیش رفت کے بعد پنجاب میں بلدیاتی انتخابات کے انعقاد کا معاملہ آخری مرحلے میں داخل ہوگیا ہے۔ صوبائی حکومت سے مشاورت کے بعد پولنگ کی تاریخ کے حوالے سے اہم اعلان متوقع ہے۔
