اسلام آباد ( پاک ترک نیوز) اسلام آباد میں بلدیاتی انتخابات کے لیے انتخابی پروگرام جاری کر دیا گیا، پولنگ 20 دسمبر بروز اتوار ہوگی۔ الیکشن کمیشن کے مطابق انتخابات 2015 کے بلدیاتی قانون کے تحت کرائے جائیں گے۔انتخابی پروگرام کے مطابق کاغذاتِ نامزدگی جمع کرانے کے لیے عوامی نوٹس 30 اکتوبر کو جاری کیا جائے گا، جبکہ امیدوار 2 نومبر سے 6 نومبر تک کاغذاتِ نامزدگی جمع کرا سکیں گے۔
امیدواروں کے ناموں کی فہرست 7 نومبر کو شائع ہوگی اور کاغذاتِ نامزدگی کی جانچ پڑتال 9 سے 13 نومبر تک کی جائے گی۔ریٹرننگ افسران کے فیصلوں کے خلاف 14 سے 18 نومبر تک اپیلیں دائر کی جا سکیں گی، جن پر 19 سے 23 نومبر تک فیصلے کیے جائیں گے۔ امیدواروں کی نظرثانی شدہ فہرست 24 نومبر کو جاری ہوگی، جبکہ کاغذاتِ نامزدگی واپس لینے کی آخری تاریخ 25 نومبر مقرر کی گئی ہے۔انتخابی نشانات 26 نومبر کو الاٹ کیے جائیں گے۔ اسلام آباد میں پولنگ 20 دسمبر کو صبح 8 بجے سے شام 4 بجے تک جاری رہے گی۔
یہ بھی پڑھیں: مریم نواز کی سعودی سفیر سے ملاقات، پنجاب سے سعودی عرب کو 500 ارب روپے سے زائد کی برآمدات بڑھانے پر اتفاق
الیکشن کمیشن کے مطابق انتخابی نتائج کی یکجائی کا عمل 21 سے 24 دسمبر تک مکمل کیا جائے گا۔ عام تعطیل کے دن بھی الیکشن کمیشن اور ریٹرننگ افسران کے دفاتر کھلے رہیں گے۔
