لیڈز ( پاک ترک نیوز) پاکستان اور انگلینڈ کے درمیان پہلے ٹیسٹ کے دوسرے روز انگلینڈ نے میچ پر اپنی گرفت مضبوط کرلی۔ بارش کے باعث کھیل تاخیر سے شروع ہونے کے باوجود میزبان ٹیم نے دن کے اختتام تک 8 وکٹوں کے نقصان پر 366 رنز بنا لیے اور پاکستان کے پہلی اننگز کے 171 رنز کے جواب میں 195 رنز کی برتری حاصل کرلی۔
انگلینڈ کی جانب سے ہیری بروک نے شاندار بیٹنگ کرتے ہوئے 91 رنز بنائے، تاہم وہ سنچری مکمل نہ کرسکے۔ جو روٹ نے 66، جارڈن کاکس نے 73 جبکہ ڈین لارنس نے 51 رنز کی اہم اننگز کھیلی۔ بروک اور لارنس کے درمیان 120 رنز کی شراکت نے انگلینڈ کی پوزیشن مزید مستحکم کی۔
پاکستان کی جانب سے اسپنر علی عثمان نمایاں رہے، جنہوں نے اپنے ٹیسٹ کیریئر کی پہلی پانچ وکٹوں کی اننگز مکمل کی۔ علی عثمان نے 92 رنز دے کر 5 کھلاڑیوں کو آؤٹ کیا اور انگلینڈ کی بیٹنگ کو آخری مرحلے میں محدود کرنے میں اہم کردار ادا کیا۔
یہ بھی پڑھیں: پاکستان، سری لنکا اور انگلینڈ کے درمیان کرکٹ سیریز کا اعلان
اس سے قبل پاکستان کی پوری ٹیم پہلی اننگز میں صرف 171 رنز پر آؤٹ ہوگئی تھی، جس کے بعد انگلینڈ نے بیٹنگ شروع کی۔ میزبان ٹیم کو ابتدائی طور پر پاکستانی بولرز کی جانب سے کچھ دباؤ کا سامنا کرنا پڑا، تاہم مڈل آرڈر نے شاندار مزاحمت کرتے ہوئے اسکور کو 366 رنز تک پہنچا دیا۔ ہیری بروک کو اننگز کے آغاز میں ایک موقع بھی ملا جس سے فائدہ اٹھاتے ہوئے انہوں نے جارحانہ بیٹنگ کی، تاہم علی عثمان نے انہیں 91 رنز پر بولڈ کرکے پاکستان کو اہم کامیابی دلائی۔
