لاہور( پاک ترک نیوز) آن لائن خریداری عام ہو چکی ہے لیکن اس کے ساتھ ہی آن لائن دھوکا دہی کے واقعات میں بھی اضافہ ہو رہا ہے۔ اگر صارفین چند بنیادی احتیاطی تدابیر پر عمل کریں تو وہ اکثر آن لائن فراڈ سے بچ سکتے ہیں۔
سائبر سیکیورٹی ماہرین کا کہنا ہے کہ سب سے پہلے صارفین کو ہمیشہ معتبر اور معروف ویب سائٹس سے خریداری کرنی چاہیے۔ مشہور برانڈز سے خریداری کرنے کا خطرہ کم ہوتا ہے۔ کسی نئے اسٹور سے خریداری کرنے سے پہلے اس کی ریٹنگ، ریویوز اور صارفین کے تجربات کا جائزہ ضرور لیں۔ جعلی ویب سائٹس عموماً غیر معمولی آفرز یا انتہائی کم قیمتوں کا لالچ دیتی ہیں، جو اکثر دھوکا دہی کا باعث بنتی ہیں۔
ادائیگی کے دوران بھی احتیاط ضروری ہے۔ آن لائن خریداری ہمیشہ محفوظ پیمنٹ گیٹ ویز کے ذریعے کی جائے اور غیر معروف بینک ٹرانسفرز یا براہِ راست اکاؤنٹ نمبرز دینے سے بچا جائے۔ اگر کیش آن ڈیلیوری آپشن دستیاب ہو تو اسے ترجیح دی جائے، خاص طور پر پہلی بار خریداری کرتے وقت۔ اس کے علاوہ، کریڈٹ یا ڈیبٹ کارڈ کی معلومات صرف محفوظ ویب سائٹس (جو HTTPS سے شروع ہوتی ہیں) پر ہی درج کریں۔
جعلی اسٹورز اکثر غیر متعلقہ یا انٹرنیٹ سے لی گئی تصاویر استعمال کرتے ہیں جبکہ معتبر ویب سائٹس اپنی مصنوعات کی اصل تصاویر فراہم کرتی ہیں۔ اگر ویب سائٹ پر واٹس ایپ نمبر دیا گیا ہو تو اس پر ہونے والی گفتگو کے اسکرین شاٹس محفوظ رکھنا بھی ایک اچھا عمل ہے، تاکہ کسی مسئلے کی صورت میں ثبوت موجود ہو۔
ماہرین یہ بھی مشورہ دیتے ہیں کہ ڈلیوری کے وقت اگر پارسل کھولنے کی اجازت نہ ہو، تو اسے فوراً قبول کرنے کے بجائے ویڈیو بناتے ہوئے کھولنا بہتر ہے۔ اس طرح اگر پروڈکٹ مختلف ہو، ٹوٹی ہوئی ہو یا کم قیمت کی ہو، تو آپ کے پاس شکایت درج کرانے کے لیے ثبوت موجود ہوگا۔
