آر اے شمشاد
تیز ترین کرکٹ کے اس دور میں جہاں ہر گیند کو شائقین بائونڈری سے باہر جاتا دیکھنا چاہتے ہیں او ر ہر بائولر سے ہرگیند پر وکٹ کے خواہاں ہیں وہیں انگلینڈ کے مایہ ناز بلے باز جوئے روٹ جو متعدد ریکارڈ کے مالک ہونے کے ساتھ ساتھ ٹیسٹ میں اپنی دھاک پوری طرح بٹھانے میں کامیاب ہوئےہیں ان کے بارے یہ کہا جائے کہ کوئی مقابل نہیں دور دور تک تو شاید غلط نہ ہو گا ۔
جوئے روٹ جنہوں نے اپنے کرکٹ کیریئر کا آغاز 2012میں کیا تھا اس کے بعد دوبارہ مڑ کر پیچھے نہیں دیکھا ۔ جوئے روٹ اس وقت ٹیسٹ کرکٹ میں سب سے زیادہ رنز بنانے والے کھلاڑیوں کی فہرست میں دوسرے نمبر پر موجودہیں ۔انہوں نے 165میچز کی 302اننگز میں ناقابل شکست رہتے ہوئے 14075رنز سکور کر لئے ہیں ۔ انہوں نے ٹیسٹ میں 41سنچریوں کے ساتھ ساتھ 67ففٹیز بھی سکور کی ہیں ۔
واضح رہے کہ ٹیسٹ کرکٹ میں سب سے زیادہ رنز کا ریکارڈ بھارت کے ماسٹر بلاسٹر بلے باز سچن ٹنڈولکر کے پاس ہے جنہوں نے 15921رنز بنائے ہیں تاہم اس ریکارڈ کو بنانے کیلئے انہوں نے 200میچز میں حصہ لیا ۔
جوئے روٹ کو اس وقت ٹیسٹ کا بے تاج بادشاہ کہا جائے تو غلط نہ ہوگا ۔ وہ نہ صرف فارم میں ہیں بلکہ مکمل طور پر فٹ بھی ہیں اور ایسا لگ رہا ہے کہ وہ سچن کا ریکارڈ توڑنے میں کامیاب ہوسکتے ہیں ۔ دوسری جانب ان کو اس وقت اس لئے بھی کوئی فکر شاید لاحق نہیں کیونکہ ان کے بعد موجودہ کرکٹ میں نیوزی لینڈ کے ٹام لیتھم واحد کھلاڑی ہیں جو اس وقت سب سے زیادہ بنانے والے کھلاڑیوں کی فہرست میں 69نمبر پر موجود ہیں اس سے اوپر تمام بلے باز ٹیسٹ کرکٹ کو خیر باد کہہ چکے ہیں ۔
یہ بھی پڑھیں: بین اسٹوکس کی نیوزی لینڈ کے خلاف تیسرے ٹیسٹ میں واپسی کا امکان
کرکٹ مبصرین کا کافی عرصے تک یہ خیال تھا کہ جس طرح کرکٹ میں جدت آئی ہے سچن کا ریکارڈ توڑنا تقریباً ناممکن لگ رہا تھا لیکن جوئے روٹ نے ان تمام اندازوں کو غلط ثابت کردیا ہے تاہم موجودہ کرکٹ میں جوئے روٹ کے ریکارڈ تک کوئی پہنچ سکتا ہے اس بارے میں کچھ کہنا قبل از وقت ہو گا فی الحال تو شاید یہی کہا جا سکتا ہے کہ کوئی مقابل نہیں دور دورتک ۔
