مظفر آباد ( پاک ترک نیوز) آزاد کشمیر قانون ساز اسمبلی کے مخصوص نشستوں کے انتخابات کے بعد سیاسی نمبر گیم میں بڑی تبدیلی آگئی، مسلم لیگ ن 31 نشستوں کے ساتھ حکومت بنانے کی واضح پوزیشن میں آگئی ہے۔آزاد کشمیر اسمبلی کے 8 مخصوص نشستوں کے انتخابات مکمل ہونے کے بعد ایوان میں سیاسی جماعتوں کی پوزیشن واضح ہوگئی۔مسلم لیگ ن نے 6 مخصوص نشستیں حاصل کرلیں، جس کے بعد اس کی مجموعی نشستوں کی تعداد 31 ہوگئی ہے۔
آزاد کشمیر اسمبلی میں سادہ اکثریت کے لیے 27 نشستیں درکار ہیں،یوں مسلم لیگ ن حکومت بنانے کے لیے مطلوبہ تعداد سے بھی آگے نکل گئی ہے۔مسلم لیگ ن نے 25 جنرل اور 6 مخصوص نشستیں حاصل کی ہیں،جبکہ ساجد عباسی کے ساتھ اتحاد کے بعد لیگی اتحاد کے ارکان کی تعداد 32 تک پہنچ گئی ہے۔دوسری جانب پاکستان پیپلز پارٹی 12 نشستوں کے ساتھ دوسرے نمبر پر ہے۔پیپلز پارٹی نے 12 جنرل اور 2 مخصوص نشستیں حاصل کی ہیں۔مسلم لیگ ن کی اتحادی جماعت عوامی دست و بازو ایک نشست کے ساتھ تیسرے نمبر پر موجود ہے۔علاقائی نتائج پر نظر ڈالیں تو۔۔۔
میرپور ڈویژن کی 13 نشستوں میں مسلم لیگ ن نے 9 جبکہ پیپلز پارٹی نے 4 نشستیں جیتیں۔مظفرآباد ڈویژن کی 9 نشستوں میں سے مسلم لیگ ن 5 اور پیپلز پارٹی 4 نشستوں پر کامیاب ہوئی۔مہاجرین کی 12 نشستوں میں سے مسلم لیگ ن نے 10 جبکہ پیپلز پارٹی نے 2 نشستیں حاصل کیں۔مخصوص نشستوں میں بھی مسلم لیگ ن نے میدان مار لیا۔ن لیگ کی مریم ادریس، مریم زمان اور سحرش قمر خواتین کی مخصوص نشستوں پر کامیاب ہوئیں، جبکہ لیگی امیدوار بیرسٹر افتخار گیلانی اور مظہر سعید شاہ نے 26،26 ووٹ حاصل کرکے کامیابی حاصل کی۔مسلم لیگ ن کے عبدالرحمان آرائیں بلامقابلہ منتخب ہوئے۔
یہ بھی پڑھیں: سویڈن میں سپرسانک اسٹیلتھ جنگی ڈرون کا مکمل ماڈل پیش
پیپلز پارٹی کی امیدوار فرزانہ یعقوب بھی خواتین کی مخصوص نشست پر کامیاب ہوگئیں۔جبکہ پیپلز پارٹی کی زوبیہ خورشید راجہ اور مسلم لیگ ن کی رفعت عابد کے درمیان ووٹ برابر ہوگئے، جس کے بعد ٹاس کے ذریعے زوبیہ خورشید راجہ کو کامیاب قرار دیا گیا۔اب تک آزاد کشمیر اسمبلی کی 45 میں سے 38 جنرل نشستوں پر انتخابات ہوچکے ہیں، جبکہ پونچھ اور سدھنوتی کے لیے 7 نشستوں پر پولنگ کی تاریخ کا اعلان ہونا باقی ہے۔آزاد کشمیر قانون ساز اسمبلی میں مجموعی طور پر 53 ارکان ہوتے ہیں، جن میں 45 جنرل اور 8 مخصوص نشستیں شامل ہیں۔
