لاہور ( پاک ترک نیوز) کیا آپ یقین کریں گے کہ دنیا کا ایک فٹبالر صرف 1 منٹ میں اتنے پیسے کما لیتا ہے جتنے کئی لوگ مہینوں میں بھی نہیں کما پاتے؟
جی ہاں، ہم بات کر رہے ہیں کرسٹیانو رونالڈو کی، جنہوں نے دولت، شہرت اور کامیابی کی نئی تاریخ رقم کر دی ہے۔
تازہ اندازوں کے مطابق رونالڈو کے خالص اثاثوں کی مالیت تقریباً 1.2 ارب ڈالر تک پہنچ چکی ہے، جبکہ وہ مسلسل تیسرے سال دنیا کے سب سے زیادہ کمائی کرنے والے کھلاڑی قرار پائے ہیں۔
صرف گذشتہ 12 ماہ میں رونالڈو نے تقریباً 300 ملین ڈالر کمائے۔ اس کا مطلب یہ ہے کہ ہر منٹ ان کی دولت میں اوسطاً 570 ڈالر سے زیادہ کا اضافہ ہوا۔
یعنی جب تک آپ یہ ویڈیو دیکھ رہے ہیں، رونالڈو ہزاروں ڈالر مزید کما چکے ہوں گے۔ یہ اعداد و شمار صرف فٹبال نہیں بلکہ ان کی کاروباری ذہانت کی بھی عکاسی کرتے ہیں۔ 2023 ء میں سعودی کلب النصر میں شمولیت نے ان کی زندگی بدل دی۔ 2025 ء میں معاہدے میں توسیع کے بعد ان کی سالانہ آمدنی 200 ملین ڈالر سے بھی تجاوز کر گئی۔
یہ بھی پڑھیں: رونالڈو کی زندگی سے جڑی غیر معمولی کہانی
ایک وقت ایسا بھی تھا جب مانچسٹر یونائیٹڈ سے علیحدگی کے بعد ناقدین نے کہا کہ رونالڈو کا سنہری دور ختم ہو چکا ہے، مگر انہوں نے ثابت کر دیا کہ بڑے کھلاڑی مشکلات سے نہیں، بلکہ اپنے فیصلوں سے پہچانے جاتے ہیں۔
فٹبال کے علاوہ نائیکی، بائنانس، ہربا لائف اور کئی عالمی برانڈز کے ساتھ معاہدے، ہوٹلز، فیشن، فٹنس اور دیگر کاروبار ان کی دولت میں مسلسل اضافہ کر رہے ہیں۔
سوشل میڈیا پر تقریباً ایک ارب فالوورز انہیں دنیا کے طاقتور ترین اسپورٹس برانڈز میں شامل کرتے ہیں، جبکہ فوربز کے مطابق وہ کھیلوں کی تاریخ کے پہلے کھلاڑی بن چکے ہیں جن کی مجموعی پیشہ ورانہ آمدنی 2 ارب ڈالر سے تجاوز کر گئی ہے۔
