اسلام آباد ( پاک ترک نیوز) امریکہ کا ویزا حاصل کرنے کے لیے طویل عرصے سے انتظار کرنے والے پاکستانی شہریوں کے لیے اہم پیش رفت سامنے آئی ہے۔
امریکی سفارت خانے نے اعلان کیا ہے کہ لاہور اور کراچی میں قائم امریکی قونصل خانے رواں ماہ سے اپنی معمول کی قونصلر اور ویزا سروسز دوبارہ شروع کر رہے ہیں، جو گزشتہ چار ماہ سے معطل تھیں۔
قونصل خانوں میں آپریشنز کی بحالی کے بعد 20 جولائی سے وزٹر، اسٹوڈنٹ، بزنس اور دیگر تمام نان امیگرنٹ ویزا درخواستوں کی پروسیسنگ دوبارہ شروع کر دی جائے گی۔
اس کے علاوہ پاکستان میں مقیم امریکی شہریوں کے لیے بھی معمول کی قونصلر خدمات بحال کر دی جائیں گی تاکہ پاسپورٹ، شہریت اور دیگر ضروری معاملات پہلے کی طرح انجام دیے جا سکیں۔
یاد رہے کہ مارچ میں سیکیورٹی خدشات کے باعث لاہور اور کراچی کے امریکی قونصل خانوں سے غیر ضروری عملہ واپس بلا لیا گیا تھا، جس کے بعد ویزا اور قونصلر آپریشنز عارضی طور پر معطل کر دیے گئے تھے۔
اس تعطل کے باعث ہزاروں پاکستانی درخواست گزاروں کو ویزا انٹرویوز، اپوائنٹمنٹس اور دیگر قونصلر خدمات کے حصول میں طویل انتظار اور مشکلات کا سامنا کرنا پڑا۔
یہ بھی پڑھیں: امریکی فوج ایران کے اندر گھس گئی تو کیا ہوگا؟
امریکی سفارت خانے نے یہ بھی یاد دلایا کہ مئی میں پشاور قونصل خانے کی خدمات مرحلہ وار ختم کرکے انہیں اسلام آباد میں امریکی سفارت خانے منتقل کرنے کا فیصلہ کیا گیا تھا۔
اب لاہور اور کراچی میں قونصلر خدمات کی بحالی سے ویزا درخواست گزاروں کو نمایاں ریلیف ملنے کی توقع ہے، جبکہ اپوائنٹمنٹس اور ویزا پروسیسنگ کا عمل بھی بتدریج معمول پر آنے کا امکان ہے۔
