اسلام آباد ( پاک ترک نیوز) وزیراعظم محمد شہباز شریف کی خصوصی ہدایت پر نادرا نے پنشنرز کے لیے پروف آف لائف سرٹیفکیٹ کے مفت اجرا کی سہولت فراہم کر دی۔
پنشنرز اب گھر بیٹھے پاک آئی ڈی کے ذریعے پروف آف لائف سرٹیفکیٹ حاصل کر سکتے ہیں، جبکہ موبائل ایپ استعمال نہ کرنے والے پنشنر کی جانب سے خاندان کا کوئی فرد بھی یہ سرٹیفکیٹ بنوا سکے گا۔یہ سہولت ملک بھر میں 5 ہزار ای سہولت فرنچائزز، 988 نادرا مراکز اور 500 یونین کونسلز میں بھی مفت دستیاب ہوگی۔ نادرا مراکز اور یونین کونسلز میں پنشنرز کو ترجیحی بنیادوں پر خدمات فراہم کی جائیں گی۔موبائل رجسٹریشن وین، بائیکر سروس اور مین پیک سروس کے ذریعے بھی پنشنرز کو پروف آف لائف سرٹیفکیٹ کی سہولت فراہم کی جائے گی۔
وزارت داخلہ، وزارت دفاع، اکاؤنٹنٹ جنرل پاکستان اور ملٹری اکاؤنٹنٹ جنرل کے اشتراک سے نادرا نے پنشنرز کے لیے نیشنل پنشنرز رجسٹر قائم کر دیا ہے۔نادرا کے مطابق نیشنل پنشنرز رجسٹر پنشنر کی شناخت اور پروف آف لائف کی ڈیجیٹل تصدیق کا مستند ذریعہ ہوگا۔ مجاز بینک اسی رجسٹر سے پنشنر کا پروف آف لائف اسٹیٹس براہ راست چیک کر سکیں گے۔
یہ بھی پڑھیں: نواز شریف کا لاہور کے مختلف علاقوں کا دورہ، ترقیاتی کاموں کا معائنہ
پنشنر کی وفات ڈیتھ نوٹیفکیشن ٹول یا سول رجسٹریشن مینجمنٹ سسٹم میں درج ہونے کی صورت میں متعلقہ پنشن کنٹرولر کو اطلاع مل جائے گی۔ اسی طرح ثانوی یا خاندانی پنشنرز کی عمر یا ازدواجی حیثیت میں تبدیلی سے بھی متعلقہ حکام کو آگاہ کیا جائے گا۔پنشن جاری رکھنے، تبدیل کرنے یا بند کرنے کا فیصلہ متعلقہ مجاز پنشن اتھارٹی کرے گی۔
ڈیجیٹل تصدیق کے نظام سے پنشنرز کو بار بار ذاتی طور پر حاضر ہونے اور کاغذی تصدیق کے مراحل سے گزرنے کی ضرورت کم ہو جائے گی۔نادرا کے مطابق مستقبل میں دیگر سرکاری اور نجی اداروں کے پنشنرز کو بھی نیشنل پنشنرز رجسٹر میں شامل کیا جائے گا
