راولپنڈی : (پاک ترک نیوز)خیبرپختونخوا میں سیکیورٹی فورسز نے دہشت گردی کے خلاف بڑی اور کامیاب کارروائیاں کرتے ہوئے دو مختلف اضلاع میں مجموعی طور پر 24 خوارج کو ہلاک کر دیا۔
یہ کارروائیاں خفیہ معلومات کی بنیاد پر کی گئیں، جن میں دشمن کے ٹھکانوں کو مؤثر انداز میں نشانہ بنایا گیا۔پاک فوج کے شعبہ تعلقات عامہ (آئی ایس پی آر) کے مطابق فورسز نے دو علیحدہ انٹیلی جنس بیسڈ آپریشنز کیے۔
پہلی کارروائی ضلع اورکزئی میں عمل میں لائی گئی، جہاں خوارج کی موجودگی کی مصدقہ اطلاعات پر فورسز نے بروقت کارروائی کی۔
شدید فائرنگ کے تبادلے کے دوران 14 دہشت گرد مارے گئے اور ان کا ٹھکانہ مکمل طور پر تباہ کر دیا گیا۔
آئی ایس پی آر کے مطابق دوسری کارروائی ضلع خیبر میں کی گئی، جہاں سیکیورٹی فورسز نے ایک اور دہشت گرد گروہ کو نشانہ بنایا۔
اس آپریشن میں مزید 10 خوارج ہلاک ہوئے، جو علاقے میں بدامنی اور دہشت گرد سرگرمیوں میں ملوث تھے۔فوج کے ترجمان کا کہنا ہے کہ مارے جانے والے تمام دہشت گرد بھارتی سرپرستی میں سرگرم تنظیم فتنہ الخوارج سے تعلق رکھتے تھے، جو خیبرپختونخوا میں سیکیورٹی فورسز اور شہریوں کو نشانہ بنانے کی کارروائیوں میں ملوث رہے ہیں۔
آئی ایس پی آر کے مطابق علاقے میں مکمل امن کے قیام اور کسی بھی ممکنہ خطرے کے خاتمے کے لیے کلیئرنس اور سینیٹائزیشن آپریشن بدستور جاری ہے، تاکہ صوبے سے دہشت گردی کے مکمل خاتمے کو یقینی بنایا جا سکے۔
خیبرپختونخوا میں سیکیورٹی فورسز کی مزید کارروائیاں، 24 دہشت گرد مارے گئے
