کھٹمنڈو ( پاک ترک نیوز) نیپال میں گلیشیئر کے انہدام سے آنے والے تباہ کن سیلاب نے بڑے پیمانے پر تباہی مچا دی ہے، ملک میں ہلاکتوں کی تعداد 939 تک پہنچ گئی ہے جبکہ ہزاروں افراد تاحال لاپتا ہیں۔ ریسکیو اداروں نے متاثرہ علاقوں میں سرچ آپریشن مزید تیز کر دیا ہے۔ شدید سیلاب اور ملبے کے باعث نیپال کے خصوصاً راسووا اور نواکوٹ اضلاع میں کئی پن بجلی منصوبے بری طرح متاثر ہوئے ہیں۔ متعدد افراد کے ہائیڈرو پاور منصوبوں کی سرنگوں میں پھنسے ہونے کا خدشہ ہے، جس کے باعث امدادی ٹیمیں بھاری ملبہ ہٹانے اور سرنگوں تک پہنچنے کی کوشش کر رہی ہیں۔
نیپالی فوج اور دیگر امدادی ادارے متاثرہ علاقوں میں لاپتا افراد کی تلاش اور لاشوں کی بازیابی میں مصروف ہیں۔ دشوار گزار پہاڑی راستوں، تباہ شدہ پلوں اور سڑکوں جبکہ مسلسل خراب موسم کے باعث ریسکیو کارروائیوں میں شدید مشکلات کا سامنا ہے۔حکام کے مطابق نیپال میں 3 ہزار 925 افراد لاپتا ہیں، جن میں سینکڑوں غیر ملکی شہری بھی شامل ہیں۔ دوسری جانب چین کے زیرِ انتظام تبت میں بھی سیلاب سے ہلاکتیں اور بڑی تعداد میں لاپتا افراد کی اطلاعات سامنے آئی ہیں۔
یہ بھی پڑھیں: راولپنڈی ،اسلام آباد میں طوفانی بارش ،جڑواں شہر زیر آب ، فوج طلب
ادھر جنوبی کوریا نے نیپال کے لیے 44 رکنی ہنگامی امدادی ٹیم بھیجنے کا اعلان کیا ہے۔ جنوبی کوریا کی وزارت خارجہ کے مطابق ٹیم میں وزارت خارجہ اور فائر ایجنسی کے اہلکار شامل ہوں گے اور یہ ٹیم فوجی طیارے کے ذریعے نیپال روانہ ہوگی۔ امدادی ٹیم تقریباً دس روز تک سرچ اینڈ ریسکیو آپریشن میں حصہ لے گی۔
