اسلام آباد ( پاک ترک نیوز) اسلام آباد میں اقتصادی رابطہ کمیٹی نے شنگھائی تعاون تنظیم کے آئندہ اجلاس کے لیے 30 بلٹ پروف گاڑیاں خریدنے کی خاطر 6 ارب 60 کروڑ روپے کی اضافی گرانٹ منظور کرلی۔وزیر خزانہ محمد اورنگزیب کی زیر صدارت اقتصادی رابطہ کمیٹی کے اجلاس میں کابینہ ڈویژن کی جانب سے 50 سے زائد بلٹ پروف گاڑیوں کی خریداری کے لیے 12 ارب 60 کروڑ روپے کی اضافی گرانٹ کی درخواست پیش کی گئی تھی۔
کمیٹی نے تفصیلی غور کے بعد 30 بلٹ پروف گاڑیوں کی خریداری کے لیے 6 ارب 60 کروڑ روپے کی منظوری دی اور کابینہ ڈویژن کو ہدایت کی کہ مزید گاڑیوں کی ضرورت کا تفصیلی جائزہ لینے کے بعد اضافی رقم کی درخواست دوبارہ پیش کی جائے۔پاکستان آئندہ سال ستمبر میں شنگھائی تعاون تنظیم کے سربراہ اجلاس کی میزبانی کرے گا، جس میں رکن ممالک کے سربراہان اور اعلیٰ سطحی وفود کی شرکت متوقع ہے۔
یہ بھی پڑھیں: لاہور 2026-27کے لیے ایس سی او کا ’’سیاحتی و ثقافتی دارالحکومت‘‘ قرار
دوسری جانب اقتصادی رابطہ کمیٹی نے پنجاب میں قائم فاطمہ فرٹیلائزر اور ایگری ٹیک کمپنیوں کو گیس کی فراہمی 30 ستمبر تک جاری رکھنے کی منظوری بھی دے دی۔
