انقرہ ( پاک ترک نیوز) ترکیہ کی دفاعی صنعت مسلسل ترقی کی جانب گامزن، ڈرون بنانے والی کمپنی بائیکار نے ترک دفاعی صلاحیتوں میں اہم کردار ادا کرتے ہوئے عالمی منڈی میں بھی اپنی جگہ مضبوط کرلی۔ کمپنی کی برآمدات گزشتہ سال ریکارڈ دو ارب بیس کروڑ ڈالر تک پہنچ گئیں۔ترکی کی دفاعی صنعت میں ڈرونز کی دھوم، بائیکار نے جدید جنگی ٹیکنالوجی کے میدان میں اپنی دھاک بٹھا دی۔ترک وزارت دفاع کے ترجمان زکی آکتورک کا کہنا ہے کہ بائیکار جدید انجینئرنگ، مضبوط تحقیق اور جدید ٹیکنالوجی کے ذریعے ترک مسلح افواج کی نگرانی، جاسوسی، معلومات کے حصول اور حملہ کرنے کی صلاحیتوں کو مزید مؤثر بنا رہی ہے۔
یہ بھی پڑھیں: ناسا کا خلائی مشنز سے رابطوں کے لیے نیا دیوہیکل ریڈیو اینٹینا نصب
بائیکار کے تیار کردہ بائراکتار ٹی بی ٹو اور آکنجی ڈرونز پہلے ہی عالمی سطح پر اپنی صلاحیتوں کا لوہا منوا چکے ہیں، جبکہ کزل ایلما جنگی طیارہ، کمان کش چھوٹے کروز میزائل اور کے ٹو خودکش بغیر پائلٹ فضائی گاڑی بھی ترکی کے جدید دفاعی منصوبوں کا حصہ ہیں۔ترک حکام کے مطابق بائیکار کی کامیابی صرف دفاعی میدان تک محدود نہیں، بلکہ کمپنی کی برآمدات میں بھی مسلسل اضافہ ہورہا ہے۔دو ہزار اکیس میں 66 کروڑ 40 لاکھ ڈالر کی برآمدات دو ہزار بائیس میں ایک ارب 20 کروڑ ڈالر تک پہنچیں، جبکہ دو ہزار تئیس اور چوبیس میں یہ رقم ایک ارب 80 کروڑ ڈالر رہی۔
دو ہزار پچیس میں بائیکار نے تمام سابقہ ریکارڈ توڑتے ہوئے دو ارب 20 کروڑ ڈالر کی برآمدات کیں۔ترکی کا دوسرا آئی کلاس جنگی بحری جہاز ازمیر بھی آزمائشی مرحلے میں داخل ہوگیا ہے، جس کے سمندری آزمائشی مراحل 31 اگست سے شروع کیے گئے ہیں۔یوں ترکی مقامی دفاعی پیداوار، جدید ڈرونز اور جنگی ٹیکنالوجی کے ذریعے عالمی دفاعی صنعت میں اپنا اثر و رسوخ مسلسل بڑھا رہا ہے۔
