راولپنڈی (پاک ترک نیوز) آئی ایس پی آر کے مطابق شمالی وزیرستان میں پاک افغان سرحد پر سیکیورٹی فورسز نے خوارج کی دراندازی کی کوشش ناکام بناتے ہوئے 15 خوارج کو ہلاک کردیا۔آئی ایس پی آر کے مطابق خوارج کا ایک گروپ افغانستان سے پاکستان میں دراندازی کی کوشش کررہا تھا، تاہم سیکیورٹی فورسز نے بروقت کارروائی کرتے ہوئے ان کے مذموم عزائم ناکام بنا دیے۔
ترجمان پاک فوج کے مطابق سیکیورٹی فورسز اور خوارج کے درمیان کارروائی 36 گھنٹے تک جاری رہی، جس کے دوران 15 خوارج ہلاک ہوئے۔ہلاک ہونے والے خوارج کے قبضے سے بڑی تعداد میں اسلحہ اور گولہ بارود بھی برآمد کیا گیا۔ آئی ایس پی آر کا کہنا ہے کہ برآمد ہونے والا اسلحہ اور گولہ بارود خوارج کے پاکستان میں دہشت گردی اور تخریبی کارروائیوں کے مذموم عزائم کا واضح ثبوت ہے۔
آئی ایس پی آر کے مطابق افغان طالبان حکومت مؤثر بارڈر مینجمنٹ اور اپنی عالمی ذمہ داریاں پوری کرنے میں ناکام رہی ہے، جس کے باعث افغان سرزمین سے پاکستان میں دراندازی کی کوششیں جاری ہیں۔سیکیورٹی فورسز نے علاقے میں صفائی کا آپریشن شروع کردیا ہے اور مزید خوارج کی تلاش جاری ہے۔آئی ایس پی آر کا کہنا ہے کہ عزمِ استحکام کے تحت ملک سے دہشت گردی کے خاتمے کے لیے کارروائیاں پوری رفتار سے جاری رہیں گی۔
یہ بھی پڑھیں:پاکستان کرکٹ ٹیم تیسرے ٹیسٹ کیلئے برمنگھم پہنچ گئی
ترجمان پاک فوج کے مطابق سیکیورٹی فورسز ملکی سرحدوں کے دفاع اور پاکستان کے عوام کو دہشت گردی سے محفوظ رکھنے کے لیے مکمل طور پر پرعزم ہیں۔
