ابہا: (پاک ترک نیوز)سعودی عرب کے عسیر ریجن میں ڈیجیٹل تبدیلی کے ایک بڑے اقدام کے تحت بلدیاتی خدمات کے لیے ڈرونز کے استعمال کا آغاز کر دیا گیا ہے، جو مملکت میں اپنی نوعیت کا پہلا پائلٹ پروگرام ہے۔
میئر عسیر عبداللہ الجالی نے بتایا کہ یہ پروگرام امارتِ عسیر نے وزارتِ بلدیات و ہاؤسنگ اور متعلقہ اداروں کے تعاون سے شروع کیا ہے۔ ابتدائی مرحلے میں گذشتہ فروری سے ابہا اور خمیس مشیط میں اس کے آزمائشی آپریشنز کیے جا رہے ہیں۔ہمیں عسیر امارت میں ڈیجیٹل ٹرانسفارمیشن کے ایک منفرد اور کامیاب منصوبے کا اعلان کرتے ہوئے خوشی ہو رہی ہے، جو ڈرون آپریشنز کا پائلٹ پروگرام ہے اور مملکت میں اپنی نوعیت کا پہلا منصوبہ ہے۔
انہوں نے وضاحت کی کہ یہ ڈرونز مصنوعی ذہانت (اے آئی) کی مدد سے بغیر انسانی مداخلت کے کام کرتے ہیں۔ یہ ترقیاتی منصوبوں کی نگرانی، تعمیرات اور کھدائی میں خلاف ورزیوں کی نشاندہی، کچرا پھینکنے اور تجاوزات کا سراغ لگانے کے ساتھ ساتھ ہنگامی صورتحال کی بروقت نشاندہی کی صلاحیت رکھتے ہیں۔ اس کے علاوہ یہ جدید ٹیکنالوجی انتہائی تیزی اور درستگی کے ساتھ ٹوپوگرافک سروے بھی انجام دیتی ہے۔
میئر عسیر کے مطابق ڈرونز کے استعمال سے بلدیاتی کارکردگی میں نمایاں بہتری آئے گی، خدمات اور معاملات کی انجام دہی میں تیزی آئے گی، جن میں لائسنس کے اجرا اور نقشوں کی منظوری جیسے امور شامل ہیں، جبکہ نگرانی اور ریگولیٹری نظام بھی مضبوط ہو گا۔اس ٹیکنالوجی کے ذریعے ہم نگرانی کے نظام کو مؤثر بنا سکتے ہیں، بصری بگاڑ کو کم کر سکتے ہیں، منصوبوں کے معیار کو بہتر بنا سکتے ہیں، شفافیت میں اضافہ اور غلطیوں میں کمی لا سکتے ہیں۔
عبداللہ الجالی نے مزید بتایا کہ حکام اس پروگرام کے دائرہ کار کو وسعت دینے پر کام کر رہے ہیں، اور آئندہ مراحل میں شہریوں کی شکایات پر فوری ردِعمل، مرمت اور صفائی کے کاموں کی نگرانی جیسے مزید استعمالات بھی آزمائے جائیں گے۔ یہ تمام اقدامات عسیر ریجن میں بلدیاتی خدمات کو جدید خطوط پر استوار کرنے کی وسیع تر حکمتِ عملی کا حصہ ہیں۔
سعودی عرب میں بلدیاتی خدمات کے لیے ڈرونز کا استعمال
