پشاور(پاک ترک نیوز) گورنر خیبرپختونخوا فیصل کریم کنڈی نے صوبائی پولیس کے شہداء کے لواحقین کے لیے مالی امدادی پیکیج میں اضافے کا اعلان کر دیا، دورانِ ڈیوٹی زخمی ہونے والے اہلکاروں اور مستقل معذوری کا شکار ہونے والوں کے لیے بھی امدادی رقوم بڑھانے کا فیصلہ کیا گیا ہے۔
گورنر فیصل کریم کنڈی کے اعلان کے مطابق گریڈ بیس اور اس سے زائد کے شہداء کا معاوضہ دو کروڑ دس لاکھ روپے سے بڑھا کر ساڑھے تین کروڑ روپے کر دیا گیا ہے، جبکہ گریڈ اٹھارہ اور انیس کے شہداء کا معاوضہ دو کروڑ دس لاکھ سے بڑھا کر تین کروڑ روپے مقرر کیا گیا ہے۔
کانسٹیبل سے انسپکٹر رینک تک کے شہداء کا معاوضہ ایک کروڑ دس لاکھ روپے سے بڑھا کر ایک کروڑ ستر لاکھ روپے کر دیا گیا، جبکہ ڈی ایس پی اور اے ایس پی رینک کے شہداء کے لواحقین کو اب ایک کروڑ ساٹھ لاکھ کے بجائے ڈھائی کروڑ روپے ملیں گے۔
یہ بھی پڑھیں: اسحاق ڈار کا ذخیرہ اندوزی اور گرانفروشی کرنے والوں کے خلاف سخت کارروائی کا حکم
اعلان کے مطابق گریڈ بیس اور اس سے زائد کے پولیس شہداء کے لواحقین کو پلاٹ دینے کے بجائے سات کروڑ روپے ادا کرنے کا فیصلہ کیا گیا ہے۔ دورانِ ڈیوٹی زخمی ہونے والے اہلکاروں کا امدادی پیکیج ایک لاکھ روپے سے بڑھا کر پندرہ لاکھ روپے کر دیا گیا، جبکہ مستقل معذوری کی صورت میں پچاس لاکھ روپے دینے کی منظوری بھی دی گئی ہے۔
گورنر فیصل کریم کنڈی نے خیبرپختونخوا پولیس کی تنخواہوں میں اضافے کا اعلان بھی کیا ہے۔
