نیو یارک ( پاک ترک نیوز) صرف ایک فٹبال میچ مگر قیمت ایسی کہ لگژری گاڑی بھی سستی لگنے لگے۔ فیفا ورلڈ کپ 2026 کے فائنل کے ٹکٹ امریکی کھیلوں کی تاریخ کے مہنگے ترین ٹکٹ بن گئے ۔ ہزاروں نہیں، بلکہ لاکھوں روپے خرچ کرکے بھی شائقین ایک نشست حاصل کرنے کے لیے بے تاب ہیں۔ آخر اس فائنل میں ایسا کیا ہے جس نے دنیا بھر کو اپنی طرف کھینچ لیا؟ آئیے دیکھتے ہیں۔
فٹبال کا سب سے بڑا میلہ اور قیمتوں کا ایسا طوفان جس نے تمام ریکارڈ توڑ دیے۔فوربز کی رپورٹ کے مطابق فیفا ورلڈ کپ 2026 کے فائنل کا سب سے سستا ٹکٹ بھی 6 ہزار 943 ڈالر کا ہے، جبکہ اوسط خریداری قیمت 11 ہزار 327 ڈالر تک جا پہنچی ہے۔ یہ کسی بھی امریکی کھیلوں کے مقابلے کے ٹکٹ کی سب سے زیادہ اوسط قیمت ہے۔
نیو جرسی کے میٹ لائف اسٹیڈیم میں ایک نشست کی قیمت تو حیران کن حد تک پہنچ گئی۔سیکشن 115A کی ایک سیٹ 28 ہزار 479 ڈالر میں فروخت ہونے کا ریکارڈ سامنے آیا، یعنی پاکستانی کرنسی میں تقریباً 80 لاکھ روپے سے بھی زائد۔ اتنی رقم میں کئی شہروں میں ایک اچھا گھر یا لگژری گاڑی خریدی جا سکتی ہے، مگر فٹبال کے دیوانوں کے لیے یہ صرف ایک ٹکٹ کی قیمت ہے۔
یہ بھی پڑھیں: اگلا ورلڈ کپ پاکستان میں ہے اس سے قبل نئی لڑکیوں کے ساتھ ٹیم تیار کرنا ہے،فاطمہ ثنا
اس سے پہلے 2024 کے سپر باؤل کو امریکہ کا مہنگا ترین کھیلوں کا ایونٹ سمجھا جاتا تھا، جہاں اوسط ٹکٹ 9 ہزار 411 ڈالر میں فروخت ہوا تھا۔لیکن فیفا ورلڈ کپ کے فائنل نے نہ صرف سپر باؤل بلکہ امریکی کھیلوں کی تاریخ کے تمام ریکارڈ توڑ ڈالے ہیں۔ ماہرین کے مطابق دنیا بھر سے آنے والے شائقین، محدود نشستیں اور تاریخی فائنل کی کشش قیمتوں میں اس غیر معمولی اضافے کی بڑی وجوہات ہیں۔
اب نظریں اس تاریخی مقابلے پر جمی ہیں جہاں دو عالمی طاقتیں ٹکرائیں گی۔اتوار کی رات دفاعی چیمپئن ارجنٹینا اور یورپی چیمپئن سپین آمنے سامنے ہوں گے۔ سپین اپنی تاریخ میں صرف دوسری مرتبہ ورلڈ کپ کا فائنل کھیل رہا ہے۔ اس سے قبل 2010 میں پہلی بار فائنل میں پہنچ کر ٹائٹل جیتا تھا۔
دوسری جانب ارجنٹینا ساتویں مرتبہ فائنل میں قسمت آزمائے گا۔ البی سیلیسٹے اب تک تین مرتبہ عالمی چیمپئن بن چکا ہے جبکہ تین فائنلز میں شکست بھی اس کا مقدر بنی۔
دنیا بھر کے کروڑوں شائقین کی نظریں امریکہ پر مرکوز ہیں، جہاں صرف ٹرافی ہی نہیں بلکہ تاریخ، اعزاز اور اربوں دلوں کی دھڑکنیں بھی داؤ پر لگی ہیں۔
اب دیکھنا یہ ہے کہ کیا سپین دوسری بار عالمی چیمپئن بنے گا یا ارجنٹینا چوتھی مرتبہ دنیا کا تاج اپنے سر سجائے گا؟ جواب صرف نوّے منٹ… یا شاید اس سے بھی زیادہ وقت بعد دنیا کے سامنے ہوگا۔
