اسلام آباد ( پاک ترک نیوز) چیئرمین پی ٹی آئی بیرسٹر گوہر نے کہا ہے کہ بانی پی ٹی آئی عمران خان کی اسپتال منتقلی کے سپریم کورٹ کے فیصلے پر عملدرآمد ہونا چاہیے، حکومت کو پریشانی نہیں ہونی چاہیے، پی ٹی آئی نے ہر طرح کی انڈرٹیکنگ دی ہے۔
بیرسٹر گوہر کا کہنا تھا کہ بڑی مشکل اور طویل عرصے کی کوششوں کے بعد اس فیصلے تک پہنچے ہیں، دونوں فریقین سے اپیل ہے کہ سپریم کورٹ کے فیصلے کو سبوتاژ نہ کریں۔انہوں نے کہا کہ بانی پی ٹی آئی کی صحت ہماری اولین ترجیح ہے، صحت کے معاملے پر کسی قسم کی سیاست نہیں ہونی چاہیے۔
یہ بھی پڑھیں: بانی پی ٹی آئی کے علاج پر کوئی ابہام نہیں، صحت کا معاملہ سیاست سے الگ رہنا چاہیے: عطاء تارڑ
چیئرمین پی ٹی آئی نے پی ٹی آئی کے سوشل میڈیا ایکٹوسٹس سے بھی اپیل کی کہ وہ کوئی ایسا اقدام نہ کریں جس سے سپریم کورٹ کے فیصلے پر منفی اثرات مرتب ہوں۔بیرسٹر گوہر نے کہا کہ امید ہے سپریم کورٹ کے فیصلے پر من و عن عملدرآمد ہوگا اور تمام فریقین اس معاملے میں تحمل کا مظاہرہ کریں گے۔
