گلگت ( پاک ترک نیوز) گلگت میں پاکستان پیپلز پارٹی گلگت بلتستان کی پارلیمانی پارٹی کا اہم اجلاس ہوا جس کی صدارت مرکزی جنرل سیکریٹری سینیٹر نیر حسین بخاری نے کی،اجلاس میں حالیہ گلگت بلتستان انتخابات کے نتائج کا تفصیلی جائزہ لیا گیا۔
پاکستان پیپلز پارٹی انتخابات میں سنگل لارجسٹ پارٹی کے طور پر ابھر کر سامنے آئی ہے، پارلیمانی پارٹی کی جانب سے اطمینان کا اظہار کیا گیا۔
اجلاس میں شرکاء نے کہا چیئرمین بلاول بھٹو زرداری اور محترمہ آصفہ بھٹو زرداری کی شاندار انتخابی مہم کے باعث پیپلز پارٹی کو گلگت بلتستان میں شاندار کامیابی حاصل ہوئی۔
اجلاس میں گلگت بلتستان میں حکومت سازی کے حوالے سے مختلف آپشنز پر بھی غور، آئندہ کے لائحہ عمل پر تفصیلی مشاورت کی گئی ،پارلیمانی پارٹی کے اراکین نے چیئرمین بلاول بھٹو زرداری پر مکمل اعتماد کا اظہار کیا ہے ۔
گلگت بلتستان میں حکومت سازی سے متعلق تمام فیصلوں کا اختیار پارلیمانی پارٹی نے چیئرمین بلاول بھٹو کو دے دیا،پارلیمانی پارٹی کا کہناہے چیئرمین بلاول بھٹو زرداری گلگت بلتستان کے عوام اور پارٹی کے وسیع تر مفاد میں جو بھی فیصلہ کریں گے وہ قبول ہوگا۔
