اسلام آباد ( پاک ترک نیوز) نائب وزیراعظم و وزیر خارجہ محمد اسحاق ڈار کی زیر صدارت نیشنل اکنامک کونسل کی ایگزیکٹو کمیٹی کا اجلاس ہوا، جس میں ترقیاتی منصوبوں کے جامع ایجنڈے پر غور کیا گیا۔
اجلاس میں خوازہ خیلہ، بشام ایکسپریس وے کی تعمیر، لیسکو، ہیسکو اور پیسکو میں بجلی کی ترسیل و تقسیم کے نظام میں بہتری کے منصوبوں کا جائزہ لیا گیا۔اجلاس میں تربیلا پانچویں توسیعی ہائیڈرو پاور منصوبے، جنوبی پنجاب میں غربت کے خاتمے کے منصوبے اور فلبرائٹ اسکالرشپ سپورٹ پروگرام سمیت پانی، مواصلات اور بنیادی ڈھانچے کے مختلف منصوبے بھی زیر غور آئے۔
کمیٹی نے نظرثانی شدہ پی سی ونز پر بھی غور کیا، جبکہ جاری ترقیاتی منصوبوں پر پیش رفت اور ان پر عملدرآمد کا جائزہ لیا گیا۔اجلاس کا مقصد ترقیاتی منصوبوں کی بروقت تکمیل اور ترقیاتی وسائل کے مؤثر استعمال کو یقینی بنانا تھا۔نائب وزیراعظم و وزیر خارجہ اسحاق ڈار نے تمام متعلقہ حکام کو ہدایت کی کہ ترقیاتی منصوبوں پر مؤثر عملدرآمد کے لیے مربوط اور بروقت اقدامات یقینی بنائے جائیں۔
یہ بھی پڑھیں: اسرائیل مقبوضہ مغربی کنارے کے حساس علاقے میں نئی یہودی بستیوںکی تعمیر بند کرے۔اسلامی ملکوں کا مطالبہ
انہوں نے کہا کہ حکومت کے معاشی ترقی اور بہتر مواصلاتی رابطوں کے وسیع تر ایجنڈے کی رفتار برقرار رکھی جائے۔اجلاس میں وفاقی وزیر خزانہ و محصولات، وزیر منصوبہ بندی، ترقی و خصوصی اقدامات، معاون خصوصی طارق باجوہ، سیکریٹریز کابینہ ڈویژن و وزارت منصوبہ بندی، اقتصادی امور ڈویژن اور صوبائی حکومتوں کے نمائندگان سمیت وفاقی و صوبائی سطح کے اعلیٰ حکام نے شرکت کی۔
