اسلام آباد ( پاک ترک نیوز) سعودی ہدایات کے مطابق وزارتِ مذہبی امور نے پاکستان میں حج 2027 کے لیے رجسٹریشن کا آغاز کر دیا ،عازمینِ حج www.hajj.mora.gov.pk پر یوزر اکاؤنٹ بنا کر اپنی اور اپنے گروپ کی تفصیلات کے ساتھ آن لائن رجسٹریشن کر سکتے ہیں۔
ترجمان وزارت مذہبی امور کے مطابق رجسٹریشن کے مرحلے پر پاسپورٹ کی ضرورت نہیں ہے، تاہم حج بکنگ کے مرحلے پر پاسپورٹ ہونا لازمی ہے جس کے بغیر حج درخواست وصول ہی نہیں کی جائے گی۔ پاسپورٹ کی میعاد 16 نومبر 2027ء تک ہو۔
وزارت مذہبی امور کے مطابق صرف رجسٹرڈ افراد کو ہی حج 2027ء کی بکنگ کرانے کی اجازت ہوگی۔رجسٹرڈ افراد کو سرکاری یا پرائیویٹ حج اسکیم میں شمولیت کا اختیار ہوگا۔اس مرحلے پر یہی طریقہ کار بیرونِ ملک مقیم پاکستانی عازمینِ حج پر بھی لاگو ہوگا۔
یہ بھی پڑھیں: حجاج کرام کی پھینکی گئی کنکریاں کہاں جاتی ہیں؟
وزارت مذہبی امور کے مطابق حج 2027ء کے لیے رجسٹریشن کی کوئی فیس نہیں ہے۔حج پیکیج 2027ء کے اخراجات اور دیگر شرائط و ضوابط حج پالیسی 2027ء کے مطابق الگ سے جاری کی جائیں گی۔حج بکنگ "پہلے آئیں پہلے پائیں” کی بنیاد پر، مطلوبہ تعداد کی تکمیل تک کھلی رہے گی۔
