اسلام آباد (پاک ترک نیوز )قومی اسمبلی کی قائمہ کمیٹی برائے داخلہ نے اسلام آباد کیپیٹل ٹیریٹری لوکل گورنمنٹ ترمیمی بل 2025 منظور کرلیا، تاہم پیپلزپارٹی کے ارکان نے بل کی مخالفت کرتے ہوئے اختلافی نوٹ جمع کرا دیا۔
اختلافی نوٹ میں پیپلزپارٹی نے کہا کہ بار بار قانون سازی کا مقصد اسلام آباد میں بلدیاتی انتخابات کا التوا لگتا ہے، حکومت جب بھی الیکشن کمیشن کے انتخابات کی طرف بڑھنے پر ترمیمی بل یا آرڈیننس لے آتی ہے۔
آغا رفیع اللہ نے سوال کیا کہ حکومت اسلام آباد میں بلدیاتی انتخابات کروانا چاہتی ہے یا نہیں؟ قادر پٹیل نے بھی بل کی مخالفت کرتے ہوئے کہا کہ نہ اسلام آباد اور نہ پنجاب میں بلدیاتی انتخابات کروائے جا رہے ہیں۔
چیئرمین کمیٹی راجہ خرم نواز نے کہا کہ اسلام آباد ایک صوبہ ہے، اس کی الگ اسمبلی ہونی چاہیے، جبکہ ان کا کہنا تھا کہ اسلام آباد کی حلقہ بندیاں اور یونین کونسلز بن چکی ہیں۔
یہ بھی پڑھیں:قومی اسمبلی میں نیشنل کمانڈ اتھارٹی ترمیمی بل اور ڈیفنس فورسز آف پاکستان ترمیمی بل منظور
وزیر مملکت داخلہ طلال چوہدری نے کہا کہ اسلام آباد، لاہور، کوئٹہ اور کراچی کی کارکردگی کا موازنہ کرنا ہے تو حکومت تیار ہے۔
اجلاس میں این سی سی آئی اے اور پی ٹی اے حکام نے سائبر فراڈ اور سمز کے معاملے پر بھی بریفنگ دی۔ پی ٹی اے کے مطابق دو سال میں 18 اعشاریہ 2 ملین سمز بند کی گئیں، جبکہ ایک سال میں ٹیلی کام کمپنیوں کو 4 ارب 20 کروڑ روپے جرمانہ کیا گیا۔
