لاہور( پاک ترک نیوز) بجلی کے بلوں پر چھپے QR کوڈ نے صارفین کو الجھن میں ڈال دیا ، سوشل میڈیا پر دعوے کیے جا رہے ہیں کہ QR کوڈ اسکین نہ کیا تو بجلی سبسڈی ختم ہو جائے گی، جبکہ دوسری جانب پاور ڈویژن نے شہریوں کو خبردار کر دیا ہے کہ جعلی لنکس اور QR کوڈز کے ذریعے معلومات چوری کی جا سکتی ہیں۔ سبڈی کی آخر حقیقت کیا ہے؟کون سبسڈی کا اہل ہوگا؟،اور QR کوڈ کا اصل مقصد کیا ہے؟دیکھیے اس خصوصی رپورٹ میں۔
حکومتی پالیسی کے مطابق مستقبل میں بجلی سبسڈی زیادہ تر انہی صارفین کو دی جائے گی جو بے نظیر انکم سپورٹ پروگرام یا دیگر سماجی تحفظ کے ڈیٹا میں شامل ہوں گے۔توانائی ماہرین کے مطابق حکومت سبسڈی کے نظام کو “ٹارگٹڈ سبسڈی” میں تبدیل کرنا چاہتی ہے تاکہ صرف حقیقی مستحقین کو ریلیف دیا جا سکے۔
دوسری طرف حکومت کی جانب سے بجلی سبسڈی کے نظام میں نئی نگرانی شروع کر دی گئی ہے۔بجلی تقسیم کار کمپنیوں نے سبسڈی حاصل کرنے والے بعض صارفین کے بلوں پر QR کوڈ شائع کرنا شروع کر دیا ،ذرائع کے مطابق اس اقدام کا مقصد ایسے صارفین کا ریکارڈ جمع کرنا ہے جو ایک سے زائد سنگل فیز میٹر لگا کر کم یونٹس کی بنیاد پر سبسڈی حاصل کرتے رہے۔
دوسری جانب سوشل میڈیا پر QR کوڈ سے متعلق کئی جعلی پیغامات بھی گردش کر رہے ہیں۔پیغامات میں صارفین کو مخصوص لنک کھول کر ذاتی معلومات، شناختی کارڈ نمبر اور موبائل ڈیٹا درج کرنے کیلئے کہا جاتا ہے۔پاور ڈویژن نے واضح کیا ہے کہ بجلی سبسڈی کیلئے صارفین کو کسی غیر متعلقہ ویب سائٹ یا ڈیجیٹل فارم پر معلومات فراہم کرنے کی ضرورت نہیں۔حکام کے مطابق بعض جرائم پیشہ عناصر جعلی QR کوڈز اور لنکس کے ذریعے شہریوں کی ذاتی معلومات حاصل کرنے کی کوشش کر رہے ہیں۔پاور ڈویژن کا کہنا ہے کہ اس قسم کی سرگرمیاں غیر قانونی ہیں اور قانون نافذ کرنے والے اداروں کو اس حوالے سے آگاہ کر دیا گیا ہے۔“عوام کسی بھی نامعلوم QR کوڈ یا لنک پر اپنی ذاتی معلومات ہرگز درج نہ کریں، کیونکہ یہ سائبر فراڈ بھی ہو سکتا ہے۔
ماہرین کے مطابق حکومت کا اصل مقصد بجلی سبسڈی کے غلط استعمال کو روکنا اور ایک سے زائد میٹرز کے ذریعے رعایت لینے والوں کی نشاندہی کرنا ہے۔
تاہم شہریوں کو ہدایت کی گئی ہے کہ وہ صرف سرکاری اعلانات پر اعتماد کریں اور کسی غیر مصدقہ لنک یا QR کوڈ کے ذریعے معلومات شیئر نہ کریں۔
بجلی بلوں پر QR کوڈ کے معاملے نے عوام میں تشویش پیدا کر دی ہے، لیکن حکام کا کہنا ہے کہ اصل جنگ جعلی لنکس، سائبر فراڈ اور سبسڈی کے غلط استعمال کے خلاف ہے۔ضرورت اس بات کی ہے کہ صارفین محتاط رہیں اور صرف مستند معلومات پر یقین کریں۔
