کولمبو : (پاک ترک نیوز)انٹرنیشنل کرکٹ کونسل کے مینز ٹی20 ورلڈ کپ کا آغاز آج سے سری لنکا اور بھارت میں ہو رہا ہے، تاہم میگا ایونٹ کے افتتاحی میچ پر بارش کے بادل منڈلا رہے ہیں۔
پہلے ہی دن تین اہم مقابلے شیڈول ہیں، جن میں سب سے زیادہ توجہ پاکستان اور نیدرلینڈز کے درمیان ہونے والے میچ پر مرکوز ہے۔
پاکستانی ٹیم اپنا پہلا میچ سری لنکا کے شہر کولمبو میں نیدرلینڈز کے خلاف کھیلے گی، جو پاکستانی وقت کے مطابق صبح ساڑھے دس بجے شروع ہوگا۔
موسمی پیش گوئی کے مطابق میچ کے دوران بارش کا امکان موجود ہے، جس کے باعث مقابلہ متاثر ہونے کا خدشہ ظاہر کیا جا رہا ہے۔
گرین شرٹس نے کولمبو میں میچ کی تیاریوں کے لیے بھرپور پریکٹس سیشن کیے، جن میں بیٹنگ، بولنگ اور فیلڈنگ پر خصوصی توجہ دی گئی۔
تاہم دو روز قبل پاکستان اور آئرلینڈ کے درمیان وارم اپ میچ بارش کے باعث منسوخ ہو چکا ہے، جس نے ٹیم مینجمنٹ کو تشویش میں مبتلا کر دیا ہے۔پاکستان گروپ اے میں بھارت، امریکا، نمیبیا اور نیدرلینڈز کے ساتھ شامل ہے اور اپنے تمام گروپ میچز سری لنکا میں کھیلے گا۔
حکومت پاکستان کے بھارت کے خلاف میچ نہ کھیلنے کے فیصلے کے بعد قومی ٹیم کے لیے ہر میچ غیر معمولی اہمیت اختیار کر چکا ہے۔ بارش کی صورت میں میچ منسوخ ہوا تو دونوں ٹیموں کو ایک ایک پوائنٹ ملے گا، جو پاکستان کے لیے نقصان دہ ثابت ہو سکتا ہے۔
قومی ٹیم کے کپتان سلمان علی آغا نے کہا ہے کہ وہ بدستور نمبر تین پر بیٹنگ کریں گے اور ٹیم کمبی نیشن میں فی الحال کسی تبدیلی کی ضرورت نہیں۔ ان کا کہنا تھا کہ میدان میں وہی کھلاڑی اتریں گے جو ٹیم کے لیے بہترین ہوں، خواہ وہ فخر زمان ہوں یا بابر اعظم۔
نیدرلینڈز کے بیٹر میکس اوڈاوڈ کا کہنا ہے کہ پاکستان ایک مضبوط اور تجربہ کار ٹیم ہے، جسے شکست دینا آسان نہیں ہوگا۔
افتتاحی روز دیگر مقابلوں میں ویسٹ انڈیز کا سامنا اسکاٹ لینڈ سے ہوگا، جبکہ دفاعی چیمپئن بھارت امریکا کے خلاف میدان میں اترے گا۔ ایونٹ کے تمام میچز جیو سوپر اور ڈیجیٹل ایپ مائیکو پر براہ راست نشر کیے جائیں گے۔
ٹی 20ورلڈ کپ : افتتاحی میچ میں پاکستان اور نیدرلینڈ آمنے سامنے ، کولمبو میں بارش کا امکان
