نیویارک ( پاک ترک نیوز) سولہ برس بعد ایک بار پھر اسپین فٹبال کی دنیا کا نیا حکمران بن گیا ۔۔ اسپین نے فیفا ورلڈ کپ 2026 کا تاج اپنے سر سجا لیا۔۔۔ سنسنی خیز فائنل میں دفاعی چیمپئن ارجنٹینا کو ایک صفر سے شکست دے دی۔
نوے منٹ تک دونوں ٹیمیں ایک دوسرے کا دفاع توڑنے میں ناکام رہیں۔۔۔ اسٹیڈیم میں موجود ہزاروں اور دنیا بھر میں کروڑوں شائقین کو پہلے گول کے لیے ایک سو چھ منٹ انتظار کرنا پڑا۔۔۔ اضافی وقت میں اسپین کا ایک گول مسترد بھی ہوا، مگر ہمت نہ ہاری۔۔۔ اور پھر ایک لمحہ آیا جس نے تاریخ بدل دی۔
ایکسٹرا ٹائم کے دوسرے ہاف میں فیران ٹوریس نے فیصلہ کن گول داغ کر اسپین کو عالمی چیمپئن بنا دیا۔۔۔ گول ہوتے ہی اسٹیڈیم "ویوا اسپین” کے نعروں سے گونج اٹھا۔۔۔ جبکہ ارجنٹینا کے کھلاڑی مایوسی سے میدان میں بیٹھ گئے۔
یہ بھی پڑھیں: فیفاورلڈکپ2026 فائنل میں شکست پر میسی آبدیدہ
فائنل اعصاب شکن بھی ثابت ہوا۔۔۔ ارجنٹینا کو سات ییلو کارڈ دکھائے گئے۔۔۔ فرنانڈس خطرناک فاؤل پر ریڈ کارڈ دیکھ کر میدان سے باہر چلے گئے، جس کے بعد ارجنٹینا کی واپسی کی امیدیں بھی دم توڑ گئیں۔
چیمپئن بننے والی اسپینی ٹیم کو پانچ کروڑ ڈالر کی انعامی رقم دی گئی۔۔۔ امریکی صدر ڈونلڈ ٹرمپ نے خود فاتح ٹیم کو ورلڈ کپ ٹرافی اور طلائی تمغے پہنائے۔۔۔ جبکہ رنر اپ ارجنٹینا کے کھلاڑیوں نے چاندی کے تمغے وصول کیے۔۔۔ ٹرمپ نے پورا فائنل وی آئی پی باکس سے دیکھا اور تقریب کے مہمانِ خصوصی رہے۔
انفرادی اعزازات میں بھی اسپین کا ڈنکا بجا۔۔۔ پال کوبارسی ینگ پلیئر آف دی ٹورنامنٹ قرار پائے۔۔۔ اُنائی سائمن بہترین گول کیپر بنے۔۔۔ جبکہ کپتان روڈریگو ٹورنامنٹ کے بہترین کھلاڑی کا اعزاز لے اڑے۔۔۔ دوسری جانب فرانس کے سپر اسٹار کیلیان ایم باپے نے دس گولز کے ساتھ گولڈن بوٹ جیت کر مسلسل دوسری مرتبہ یہ منفرد اعزاز اپنے نام کیا اور ورلڈ کپ میں بائیس گولز کا نیا عالمی ریکارڈ بھی قائم کر دیا۔
شکست کے بعد سب سے جذباتی منظر اُس وقت دیکھنے میں آیا جب لیونل میسی اپنی آنکھوں سے آنسو نہ روک سکے۔۔۔ مسلسل دوسری مرتبہ ورلڈ کپ جیتنے کا خواب ٹوٹ گیا۔۔۔ ارجنٹینا کو ورلڈ کپ فائنلز میں چوتھی شکست کا سامنا کرنا پڑا۔۔۔ اور تاریخ دہرا دی کہ صرف برازیل اور اٹلی ہی مسلسل دو مرتبہ عالمی چیمپئن بننے کا اعزاز رکھتے ہیں۔
فائنل نے ارجنٹینا کے نام ایک ایسا ریکارڈ بھی لکھ دیا جسے شاید وہ کبھی یاد نہیں رکھنا چاہے گا۔۔۔ نوے منٹ میں ارجنٹینا گول کی سمت ایک بھی شاٹ نہ لگا سکا۔۔۔ ورلڈ کپ فائنل کی تاریخ میں ایسا پہلی مرتبہ ہوا۔۔۔ اس کے برعکس اسپین نے نو شاٹس آن ٹارگٹ اور مجموعی طور پر پندرہ حملے کیے، جو اس کی مکمل برتری کا ثبوت تھے۔
ادھر میڈرڈ کی سڑکیں جشن میں ڈوب گئیں۔۔۔ لاکھوں مداح قومی پرچم اٹھائے ناچتے، گاتے اور آتش بازی کرتے رہے۔۔۔ پاکستان میں بھی فٹبال کے دیوانوں نے بڑی اسکرینوں پر تاریخی فائنل دیکھا۔۔۔ کراچی کے لیاری فٹبال اسٹیڈیم میں وزیراعلیٰ سندھ بھی شائقین کے درمیان موجود رہے، جہاں ہر گول پر جذبات دیدنی تھے۔
