بیجنگ ( پاک ترک نیوز) پاکستان اور چین نے دو طرفہ فوجی تعاون اور اسٹریٹجک روابط کو مزید مضبوط کرنے کے عزم کا اعادہ کیا ہے ۔
چینی وزارتِ دفاع نے دونوں ممالک کے تعلقات کو دیرپا آہنی دوستی قراردے دیا ،چینی وزارت دفاع کے ترجمان نے پریس بریفنگ میں کہا چین اور پاکستان ایسے اچھے ہمسایہ ہیں جو پہاڑوں اور دریاؤں کے ذریعے جڑے ہوئے ہیں، ایسے اچھے دوست ہیں جو ایک دوسرے پر اعتماد کرتے ہیں، ایسے شراکت دار ہیں جو ایک دوسرے کی حمایت کرتے ہیں، اور ایسے بھائی ہیں جو مشکل وقت میں ایک ساتھ کھڑے رہتے ہیں۔
کرنل جیانگ بن نے دونوں ممالک کے درمیان قریبی فوجی تعلقات کو اجاگر کرتے ہوئے کہا کہ اسٹریٹجک رابطوں، مشترکہ فوجی مشقوں اور تربیت، اہلکاروں کے تبادلوں، اور دفاعی سازوسامان و ٹیکنالوجی کے تعاون کے شعبوں میں عملی تعاون نے مثبت نتائج دیے ہیں۔
ترجمان نے کہا کہ چین دونوں ممالک کے رہنماؤں کی اسٹریٹجک رہنمائی میں پاکستان کے ساتھ مل کر روایتی دوستی کو آگے بڑھانے، اسٹریٹجک روابط میں اضافہ کرنے، عملی تعاون کو مزید گہرا کرنے، اور بنیادی قومی مفادات کے معاملات پر ایک دوسرے کی بھرپور حمایت جاری رکھنے کے لیے تیار ہے۔
انہوں نے مزید کہا دونوں ممالک فوجی تعلقات کو مزید بلند سطح پر لے جائیں گے اور نئے دور میں چین پاکستان مشترکہ مستقبل کی حامل برادری کی تعمیر میں کردار ادا کریں گے، جبکہ علاقائی اور عالمی امن، ترقی اور سلامتی کے فروغ کے لیے بھی مشترکہ کوششیں جاری رکھیں گے۔
کرنل جیانگ بن نے کہا کہ سفارتی تعلقات کے قیام کے 75 برسوں میں دونوں ممالک کی دوستی نے عالمی حالات کی تبدیلیوں کا کامیابی سے مقابلہ کیا اور وقت کے ساتھ مزید مضبوط ہوئی ہے۔
انہوں نے کہا کہ پاکستانی عوام اکثر چین پاکستان دوستی کو پہاڑوں سے بلند، سمندروں سے گہری اور شہد سے زیادہ میٹھی قرار دیتے ہیں، جبکہ چینی عوام محبت سے پاکستان کو آئرن پاکستان کہتے ہیں۔
پاکستان اور چین کا فوجی تعاون بڑھانے کے عزم کا اعادہ
