اسلام آباد ( پاک ترک نیوز) پاکستان میں سرمایہ کاری کے نئے امکانات روشن ہونے لگے ۔ چین کمپنی نے پاکستان میں تقریباً دس ارب ڈالر کی سرمایہ کاری میں دلچسپی ظاہر کر دی اگر یہ منصوبہ حقیقت بن گیا تو پاکستان کیلئے ایک نئی تاریخ رقم ہو سکتی ہے ۔
سرمایہ کاری کے میدان میں ایک اور خوشخبری سامنے آ گئی ، ،،چینی وفد نے پاکستان میں کان کنی ،معدنیات ،جدید ٹیکنالوجی کی صنعتوں سمیت مختلف شعبوں میں سرمایہ کاری کا عندیہ دیا ہے۔
یہ پیشرفت وفاقی وزیر برائے سرمایہ کاری بورڈ قیصر احمد شیخ اور چینی وفد کے درمیان سامنے آئی ،چینی وفد نے پاکستانی وزیر کو اپنی کمپنی عالمی پروفائل اور آپریشنز سے آگاہ کیا ، چینی صدر نے مزید بتایا کہ ایرو اسپیس ڈویلپمنٹ انڈسٹری انویسٹمنٹ گروپ جدید ٹیکنالوجیز، ایرو اسپیس ڈویلپمنٹ، مصنوعی ذہانت، الیکٹرک گاڑیاں، ڈرون ٹیکنالوجیز، اور توانائی کے منصوبوں سمیت شعبوں میں اسٹریٹجک صنعتی سرمایہ کاری میں مصروف ہے۔
چینی وفد نے پاکستان کی اقتصادی ترقی اور تکنیکی ترقی میں تعاون کے طویل المدتی وژن کو اجاگر کرتے ہوئے مہارتوں کی ترقی کے اقدامات پر پاکستان کے ساتھ تعاون کرنے میں اپنی دلچسپی پر بھی زور دیا۔وفد نے ون بیلٹ ون روڈ پراجیکٹ کے مقاصد کی حمایت اور علاقائی روابط اور اقتصادی تعاون کو بڑھانے کے لیے پاکستان کے ساتھ مل کر کام کرنے پر آمادگی کا اظہار کیا۔
معاشی ماہرین کے مطابق اس سرمایہ کاری سے پاکستان میں نئی ملازمتوں کے مواقع پیدا ہوں گے، ٹیکنالوجی ٹرانسفر ممکن ہوگی اور ملک کے خلائی و دفاعی شعبوں میں بھی نمایاں بہتری آ سکتی ہے۔پاکستان اور چین پہلے ہی اقتصادی راہداری منصوبے کے ذریعے قریبی اقتصادی تعاون کر رہے ہیں، ماہرین کا کہنا ہے کہ اگر دس ارب ڈالر کی یہ ممکنہ سرمایہ کاری عملی شکل اختیار کر لیتی ہے تو یہ پاکستان کی ٹیکنالوجی اور خلائی صنعت کیلئے ایک بڑا سنگ میل ثابت ہو سکتی ہے۔
