رمضان میں صدقہ فطر کتنا ادا کرنا ہوگا؟ اسلامی نظریاتی کونسل نے نصاب جاری کر دیا

اسلام آباد: (پاک ترک نیوز) رمضان المبارک کے آغاز سے پہلے ہی اسلامی نظریاتی کونسل نے رواں سال کے لیے صدقہ فطر اور فدیۂ روزہ کی نئی شرح کا اعلان کر دیا ہے۔
چیئرمین اسلامی نظریاتی کونسل علامہ ڈاکٹر راغب حسین نعیمی کے مطابق کم از کم صدقہ فطر اور فدیۂ صوم کی رقم 300 روپے فی کس مقرر کی گئی ہے۔
ان کا کہنا ہے کہ صدقہ فطر اور فدیۂ روزہ مختلف اجناس کے حساب سے ادا کیا جا سکتا ہے۔ گندم کے آٹے کے حساب سے یہ رقم 300 روپے جبکہ جو کے حساب سے 1100 روپے مقرر کی گئی ہے۔
اسی طرح کھجور کے حساب سے 1600 روپے، کشمش کے حساب سے 3800 روپے اور منقیٰ کے حساب سے 5400 روپے ادا کیے جا سکتے ہیں، جب کہ سرکاری آٹے کے مطابق یہ رقم 200 روپے بنتی ہے۔
چیئرمین اسلامی نظریاتی کونسل نے واضح کیا کہ صدقہ فطر ہر مسلمان پر لازم ہے، چاہے وہ مرد ہو یا عورت، بالغ ہو یا نابالغ، آزاد ہو یا زیر کفالت۔
انہوں نے صاحبِ استطاعت افراد پر زور دیا کہ وہ کم سے کم شرح تک محدود نہ رہیں بلکہ اپنی مالی حیثیت کے مطابق زیادہ رقم ادا کریں تاکہ مستحق اور نادار طبقے کو زیادہ فائدہ پہنچ سکے۔
ان کا کہنا تھا کہ صدقہ فطر کا بنیادی مقصد معاشرے کے کمزور طبقات کو عید کی خوشیوں میں شریک کرنا ہے، اس لیے اس فریضے کی ادائیگی میں دل کھول کر حصہ لینا چاہیے۔