لاہور: (پاک ترک نیوز)محکمہ موسمیات کی جانب سے جاری الرٹ میں کہا گیا ہے کہ 22اور 23 جنوری کے دوران تیزبارش، شدید برفباری کے باعث ناران، کاغان، دیر، سوات، کالام، چترال، کوہستان، مانسہرہ، ایبٹ آباد، شانگلہ، استور، ہنزہ، اسکردو، مری، گلیات، وادیٔ نیلم، باغ، پونچھ، حویلی اور راولاکوٹ میں سڑکوں کے بند ہونے اور پھسلن کی وجہ سے ٹریفک کی روانی میں خلل کا اندیشہ ہے۔
تیزبارش اورشدید برفباری کے باعث بالائی خیبر پختونخوا، کشمیر اور گلگت بلتستان کے مقامی ندی نالوں میں طغیانی کا خدشہ جبکہ پہاڑی علاقوں میں لینڈ سلائیڈنگ/برفانی تودے گرنے کا خطرہ ہے۔ اس دوران سیاحوں کو محتاط رہنے اور غیر ضروری سفر سے اجتناب کی ہدایت کی گئی ہے۔
جمعرات کے روز خیبر پختونخوا ،کشمیر، گلگت بلتستان، اسلام آباد،بالائی /وسطی پنجاب اور شمالی/شمال مشرقی بلوچستان میں اکثر مقامات پر تیز ہواؤں اور گرج چمک کے ساتھ وقفے وقفے سے بارش اور پہاڑوں پر برفباری ۔ جبکہ بالائی علاقوں میں شام اور رات میں درمیانی سے شدید بارش اوربرفباری کا امکان ہے۔جنوبی پنجاب، سندھ اور جنوبی بلوچستان میں کہیں کہیں تیز ہواؤں اور گرج چمک کے ساتھ بارش کی توقع ہے۔
جمعه کے روز بالائی خیبر پختونخوا ،کشمیر، گلگت بلتستان، اسلام آباد اوربالائی پنجاب میں تیز ہواؤں اور گرج چمک کے ساتھ بارش اور پہاڑوں پر برفباری کا امکان ۔ جبکہ بالائی خیبر پختونخوا ، شمال مشرقی پنجاب اورکشمیر میں درمیانی سے شدید بارش/برفباری بھی ہو سکتی ہے۔
راولپنڈی ، جہلم،اٹک،چکوال،تلہ گنگ، سرگودھا، حافظ آباد، سیالکوٹ، نارووال، گجرات ،گوجرانوالہ، منڈی بہاؤالدین،لاہور،قصور،اوکاڑہ، ننکانہ،شیخوپورہ، فیصل آباد، چنیوٹ میں وقفے وقفے سے تیز ہواؤں اور گرج چمک کے ساتھ بارش ۔ اس دوران شمال مشرقی اضلاع میں تیز بارش اور ژالہ باری کی بھی توقع ہے۔ مری، گلیات اور گردو نواح میں مطلع ابرآلود اورموسم سردرہنے کے علاوہ تیز ہواؤں اور گرج چمک کے ساتھ درمیانی سے تیز بارش، برفباری کا امکان ہے۔
ملک بھر میں شدید بارشوں اور برفباری کی پیشگوئی
