مشترکہ پارلیمانی کمیٹی نے مسلح افواج کےسربراہوں کی تقرری سے متعلق مجوزہ ترمیم کی منظوری دیدی

اسلام آباد ( پاک ترک نیوز) 27ویں آئینی ترمیم پر غور کے لیے سینیٹ اور قومی اسمبلی کی مشترکہ کمیٹیوں کے اجلاس کے دوران مسلح افواج کےسربراہوں کی تقرری سمیت مشترکہ پارلیمانی کمیٹی نے 27 ویں آئینی ترمیم کے مجوزہ ڈرافٹ منظور کرلیا۔
اجلاس پارلیمنٹ ہاؤس کمیٹی روم نمبر 5 میں ہو رہا ہے، اجلاس میں وزیر قانون اعظم نزیر تارڑ، وزیر مملکت برائے ریلوے و خزانہ بلال اظہر کیانی، چیئرمین سینیٹ قائمہ کمیٹی قانون فاروق ایچ نائیک، اٹارنی جنرل منصور عثمان اعوان، پیپلزپارٹی کے نوید قمر شریک ہیں۔
منظور کاکڑ، ہدایت اللہ، بشیر احمد ورک، علی حیدر گیلانی، طاہر خلیل سندھو، سائرہ افضل تارڑ سینیٹر شہادت اعوان کمیٹی اجلاس میں پہنچ گئے۔
اجلاس کی صدارت پیپلز پارٹی کے سینیٹر فاروق ایچ نائیک کر رہے ہیں، جے یو آئی ف نے گزشتہ روز اجلاس کا بائیکاٹ کیا تھا، گزشتہ روز اعجاز الحق نے اجلاس میں ویڈیو لنک کے ذریعے شرکت کی تھی۔
اجلاس کے دوران آئینی عدالت کے قیام سے متعلق مشاورت مکمل کرلی گئی، مشترکہ پارلیمانی کمیٹی میں آرٹیکل 243 اور آرٹیکل 200پر مشاورت جاری ہے، مشترکہ پارلیمانی کمیٹی 27ویں آئینی ترمیم کا مجوزہ ڈرافٹ آج منظور کریگی۔
سینیٹر فاروق ایچ نائیک نے کہا کہ تمام شقوں پر آج میٹنگ ہوگی، پوری امید ہے کہ آج اس کو حتمی شکل دے دیں،ہر جماعت کو رائے دینا کا حق حاصل ہے، آج تمام جماعتوں کی آراء کو دیکھا جائے گا،جس جماعت کی جو رائے ہوگی اس پر غور کریں گے۔
فاروق نائیک کا مزید کہنا تھا کہ ن لیگ، ایم کیو ایم کی جو جو تجاویز ہونگی اس کو دیکھا جائے گا، اکثریتی جو رائے آئے گی اس کے مطابق فیصلہ ہو گا، تمام فیصلوں کو ایوان میں پیش کیا جائے گا امید ہے شام پانچ بجے تک فائنل کر لیں گے۔
پی ٹی آئی، جے یو آئی ف، ایم ڈبلیو ایم اور پی کے میپ کے رہنما اجلاس میں شریک نہیں ہورہے، قومی اسمبلی سینیٹ میں اپوزیشن جماعتوں نے کل بائیکاٹ کیا تھا۔
ذرائع نے کہا کہ آئینی عدالت کے قیام، آرٹیکل 175-اے سے لے کر آرٹیکل 175-ایل تک 12 شقوں پر مشاورت مکمل کرلی گئی۔
ذرائع کے مطابق وزیراعظم اور وزرائے اعلیٰ کے مشیروں کی تعداد بڑھانے، سپریم جوڈیشل کونسل، سپریم جوڈیشل کمیشن کی تشکیل نو پر بھی مشاورت بھی مکمل کرلی گئی۔
ذرائع نے کہا کہ آرٹیکل 243، آرٹیکل 200 اور آرٹیکل 248، آرٹیکل 200، ججز کے تبادلوں سے متعلق مشاورت جاری ہے۔
نائب وزیراعظم و وزیرخارجہ اسحاق ڈار نے کمیٹی اجلاس میں مختصر شرکت کی، وہ کمیٹی اجلاس میں آئے اور دس منٹ بعد واپس روانہ ہو گئے۔
اجلاس کے دوران مسلم لیگ ن نے وزیراعظم کے استثنیٰ سے متعلق شق واپس لے لی، وفاقی وزیر قانون نے کہا کہ وزیر اعظم کے پیغام سے کمیٹی ارکان کو آگاہ کردیا، اجلاس میں وقفہ کردیا گیا۔
صحافیوں سے گفتگو میں ان کا کہنا تھا کہ کمیٹی نے 85 فیصد کام مکمل کر لیا ہے، امید ہے آج شام تک کمیٹی اپنا کام مکمل کر لے گی، وزیر اعظم کل آذربائجان تھے رات کو واہ واپس آئے ہیں، وزیر اعظم نے صبح ہی استثنیٰ سے متعلق تجاویز سے منع کر دیا تھا۔
وزیر قانون نے کہا کہ اٹارنی جنرل اور مجھے صبح وزیر اعظم نے بلایا تھا، صدر اور دیگر عہدوں کیلئے استثنیٰ سے متعلق فنکشنز مختلف ہیں، فنکشنز مختلف ہونے کی وجہ سے وزیر اعظم ایسا کوئی استثنیٰ نہیں چاہتے۔
اعظم نذیر تارڑ نے کہا کہ جے یو آئی کے اراکین کل کمیٹی اجلاس میں شریک ہوئے تھے، جے یو آئی اراکین نے کمیٹی کو پارٹی پالیسی سے آگاہ کیا تھا ، میرے خیال میں پارلیمانی جماعتوں کو ووٹ کا حق استعمال کرنا چاہیے۔
ذرائع کا کہنا تھا کہ کمیٹی نے آرٹیکل 209تک کی شقوں پر جائزہ مکمل کر لیا، کمیٹی وقفہ کے بعد دیگر آرٹیکل کا شق وار جائزہ لے گی، وقفہ کے بعد سیاسی جماعتوں کی تجاویز پر بھی غور ہوگا۔
وفقے کے بعد اجلاس میں آئین کے آرٹیکل 200میں ترامیم مشترکہ پارلیمانی کمیٹی سے منظور کرلی گئیں۔
مجوزہ ترمیم کے مطابق صدر مملکت ہائی کورٹ کے کسی بھی جج کو جوڈیشل کمیشن کی سفارش پر ٹرانسفر کرنے کے مجاز ہونگے، ہائی کورٹ سے ججز کے تبادلے کی صورت میں متعلقہ ہائیکورٹ کے چیف جسٹس جوڈیشل کمیشن کے ممبران ہونگے۔
مجوزہ ترمیم کے مطابق ججز کے تبادلے کا اختیار سپریم جوڈیشل کمیشن کے پاس ہوگا، ہائیکورٹ کے چیف جسٹس کا تبادلہ نہیں کیا جا سکے گا، ایسے کسی جج کا تبادلہ نہیں کیا جائیگا جو کسی دوسری عدالتی کی سنیارٹی پر اثر انداز ہوکر چیف جسٹس سے سنیئر ہو۔
مجوزہ ترمیم کے مطابق ٹرانسفر ہونے والا جج دوسری عدالت کے چیف جسٹس سے سنیئر نہیں ہوگا، ٹرانسفر سے انکار پر جج کو ریٹائر کر دیا جائیگا، ریٹائرمنٹ کی صورت میں مقرر مدت تک کی پنشن اور مراعات دی جائینگی، وفاقی آئینی عدالت کا جج بننے سے انکار پر سپریم کورٹ اور ہائیکورٹ کا متعلقہ جج ریٹائر تصور ہوگا۔
مجوزہ ترمیم کے مطابق ریٹائرمنٹ کی صورت میں مقررہ مدت تک پنشن اور مراعات ججز کو دی جائیں گی۔
مشترکہ پارلیمانی کمیٹی نے مسلح افواج کےسربراہاں کی تقرری سے متعلق آرٹیکل 243میں مجوزہ ترمیم کی منظوری دیدی جب کہ اے این پی کی ترمیم پر حکومت نے کل تک کا ٹائم مانگ لیا۔
ایم کیو ایم کی بلدیاتی انتخابات سے متعلق مجوزہ ترمیم پر مہلت مانگ لی، بلوچستان کی نشستوں پر حکومت نے دیگر اسٹیک ہولڈرز سے بھی مشاورت کا فیصلہ کیا۔
مجوزہ آئینی ترامیم پر کل حکومت اتحادی جماعتوں کو جواب دے گی، حکومت نے اتحادی جماعتوں کی تجاویز پر کل تک کی مہلت مانگ لی۔
مشترکہ پارلیمانی کمیٹی نے 27ویں آئینی ترمیم کا مجوزہ ڈرافٹ منظور کرلیا، پارلیمانی کمیٹی نے 27ویں آئینی کی مجوزہ ڈرافٹ میں شامل 49ترامیم منظور کیں۔
وزیر قانون نے کہا کہ اتحادی جماعتوں کی ترامیم پر وقت مانگا ہے، ترمیم کا مجوزہ ڈرافٹ کل سینیٹ اجلاس میں منظوری کیلئے پیش کیا جائیگا۔