واشنگٹن (پاک ترک نیوز )خلائی شائقین کے لیے آج رات آسمان پر ایک دلکش فلکیاتی نظارہ دیکھنے کا موقع ہوگا، جب نظام شمسی کے دو بڑے سیارے مریخ اور مشتری ایک دوسرے کے انتہائی قریب دکھائی دیں گے۔
فلکیاتی ماہرین کے مطابق 15 اور 16 نومبر کی درمیانی شب مریخ اور مشتری برج اسد میں ایک دوسرے سے تقریباً ایک ڈگری کے فاصلے پر نظر آئیں گے۔ دونوں سیارے مشرقی افق سے طلوع ہوں گے جبکہ ان کے نیچے ریگولس نامی روشن ستارہ بھی دکھائی دے گا۔
ماہرین کے مطابق مریخ اور مشتری کا یہ ملاپ دراصل زمین سے دیکھنے والوں کے لیے ایک بصری منظر ہوگا، حقیقت میں دونوں سیاروں کے درمیان تقریباً 59 کروڑ 20 لاکھ کلومیٹر کا فاصلہ موجود ہے۔
فلکیات کی اصطلاح میں اس منظر کو اپلس کہا جاتا ہے، جب دو سیارے زمین سے دیکھنے پر ایک دوسرے کے انتہائی قریب دکھائی دیتے ہیں۔ ایسا نظارہ عموماً ہر دو سے ڈھائی سال بعد دیکھنے کو ملتا ہے، جبکہ مریخ اور مشتری جولائی 2029 میں دوبارہ اس قدر قریب دکھائی دیں گے۔
دوربین کے ذریعے مشتری کے گرد موجود بادلوں کی رنگین پٹیاں اور مریخ کی سرخی مائل سطح کے ساتھ اس پر موجود گہرے نشانات بھی دیکھے جا سکتے ہیں۔
ماہرین کے مطابق یہ نظارہ عام آنکھ سے بھی دیکھا جا سکتا ہے، تاہم صاف آسمان اور روشنی کی آلودگی سے دور مقام کا انتخاب مشاہدے کو مزید بہتر بنا سکتا ہے۔
یہ فلکیاتی منظر نظام شمسی کے دو اہم سیاروں کو ایک ساتھ دیکھنے کا منفرد موقع فراہم کرے گا۔








