اسلام آباد ( پاک ترک نیوز) اسلام آباد میں اب نقد رقم کے بجائے ڈیجیٹل ادائیگیوں کا نظام رائج کرنے کا فیصلہ کر لیا گیا، وفاقی دارالحکومت کو پاکستان کا پہلا مکمل کیش لیس شہر بنانے کے لیے 31 دسمبر 2026 کی ڈیڈ لائن مقرر کر دی گئی۔وزیر مملکت برائے داخلہ طلال چوہدری کی زیر صدارت کیش لیس اسلام آباد منصوبے سے متعلق اہم اجلاس ہوا، جس میں چیئرمین سی ڈی اے سہیل اشرف، بینکنگ سیکٹر کے نمائندوں اور اعلیٰ حکام نے شرکت کی۔
طلال چوہدری کا کہنا تھا کہ وزیراعظم اور وزیر داخلہ محسن نقوی کی خصوصی ہدایات پر منصوبے پر تیزی سے عملدرآمد جاری ہے۔ وزیر داخلہ نے وزیراعظم سے وعدہ کیا تھا کہ اسلام آباد کو پاکستان کا پہلا کیش لیس شہر اور دنیا کا پہلا کیش لیس دارالحکومت بنایا جائے گا۔وزیر مملکت کے مطابق 30 نومبر کے بعد اسلام آباد کیپیٹل ٹیریٹری اور سی ڈی اے کے کسی بھی محکمے میں نقد ادائیگی وصول نہیں کی جائے گی، جبکہ 31 دسمبر تک تمام مرچنٹس کو ڈیجیٹل ادائیگیوں کے نظام سے منسلک کرنے کا ہدف مقرر کیا گیا ہے۔ان کا کہنا تھا کہ اسلام آباد میں پہلے ہی 26 ہزار مرچنٹس ڈیجیٹل ادائیگیوں کے نظام سے منسلک ہو چکے ہیں، ریڑھی بانوں سے لے کر بڑے کاروباری مراکز تک ہر سطح پر ڈیجیٹل ادائیگی کی سہولت فراہم کی جائے گی۔
یہ بھی پڑھیں: پی ٹی آئی کے انتخابی نشان بلے کی واپسی کا معاملہ، لاہور ہائیکورٹ میں لارجر بینچ تشکیل
طلال چوہدری کے مطابق کیش لیس نظام سے مالیاتی شفافیت، ٹیکس مانیٹرنگ اور لین دین کے نظام میں بہتری آئے گی۔اجلاس میں بینکنگ سیکٹر کے نمائندوں نے حکومتی اقدام کو سراہتے ہوئے منصوبے کی کامیابی کے لیے بھرپور تعاون کی یقین دہانی کرائی۔
